Shah ka High Court ïa kiba ïaid Yatra tang ban synreit um ha u Mawjymbuiñ

Ka Iing bishar jong ka Meghalaya High Court hynne ka sngi Palei, ka la rai ban shah ia ka kynhun Yatra ban pyndep ia ka jinglehniam da kaba shu synreit um ha u Mawjymbuin, Mawsynram. Haba kren sha ki lad pathai khubor hadien ba la kut ka Hearing ha Iing Kashari Meghalaya High Court, u Assistant Rangbah shnong ka Mawsynram u bah Hiamdor Rapsang, ula iathuh ba ka iing bishar ka la shah ia ki nongiaid Yatra ban iaid pilgrim bad ban pyndep ia ka jinglehniam jong ki ha krem Mawjymbuin tang da kaba synreit um ia u Mawjymbuin. U bah Rapsang ula iathuh ba mynshem snem, ka kynhun Yatra ki la pan jingbit ban lehniam ha Mawjymbuin, hynrei ki la kyntait ban ai jingbit namar ba kane ka mawjymbuin kam dei ka jaka lehniam hynrei kadei ka jaka jngohkai kai pyrthei.
Ula ong ba mynshem snem, la pynlong arsien ia ka Hearing ha iingbishar ba ka Dorbar shnong kan pyrkhat biang lada dang donlad ban shah ban ai jingbit ban iaid yatra ha Mawjymbuin. “Hynrei na ka liang ka Dorbar shnong bad ki paidbah, ngi la kut jingmut ba ngin nym shah ban nym ailad iano iano ban wan mane blei hynrei ban pynneh beit kum ka jaka jngohkai,” ula ong. Ha ka Hearing mynshem snem, ka dorbar ka la rai ba kin nym shah bad ba kin ieng skhem beit ha katei ka nongrim ban nym ai jingbit ban lehniam. Ula iathuh ba mynshem snem katei ka kam ka la kut bad na ka liang ki kynhun iaid Yatra mynshem snem, kila hap ban weng noh ia ka prokram jong ki ban leit sha krem Mawjymbuin bad ka Dorbar ruh ka la pyrkhat ba ka la biang hadien ba la pynshai ia ka nongrim ka shnong, hynrei kynsan ha ka 10 tarik Naitung, 2025 la mih ka hukum na High Court halor ka jingkyrpad ki Yatra ban shah tang ka jingiaid Pilgrim kaban sdang na Mahadev Khola shillong haduh Mawjymbuin.
Ula ba ha ka 11 tarik Naitung ka la don ka Hearing bad ka Dorbar shnong ka la ieng biang ha kajuh ka nongrim ban nym lah ban ai jingbit hynrei ha ka Hearing ba long hynne ka sngi, ka Iing bishar ka la shah ia ka kynhun Yatra ban pyndep ia ka jingsynreit um ia u Mawjymbuin. Katkum ka jingong u bah Rapsang, na ka liang ka shnong, ka la pynpaw ia ka jingpyrshah namar ka jingtheh bad synreit um ruh kadei shi bynta jong ka jinglehniam, hynrei na ka liang ka Iingbishar kam lah shuh ban nang kylla ktien ia kaei kaba ka la rai. “ Na ka liang jong ngi , ngi hap ban shu pdiang ia kaei kaba ka iingbishar ka rai,” ong u bah Rapsang.