Tur ki nongdie madan sha Ophis SMB, byrngem ïakhih lada ym ai COV

Ki Nongdie jingdie madan hynne ka step kila tur sha Ophis treikam ka Shillong Municipal Board (SMB) ban pynpaw ka jingpyrshah iaka jingslem ban ai iaki Certificate of Vending (COV) sa ia kito kiba bym pat ioh COV.Kane ka jingleit tur ki nongdie jingdie madan kadei ruh ban pynpaw ka jingbym hun iaki jaka bala ai shaki nongdie madan kiba la ioh jaka ha MUDA Parking Lot bad ha jaka ieng kali pyrshah SBI Main Branch.Kine ki nongdie jingdie madan kiba la tur sha Ophis SMB ki kynthup ruh kito kiba shong die jingdie haki thain Laitumkhrah, Civil Hospital Point bad Khyndai Lad. Ki nongdie jingdie madan kila dawa naki bor Sorkar ban khot jingialang ba kyrkieh jong ka Provisional Vending Town Committee (PVTC) ban iakren halor ka jingdon bun ki nongdie jingdie madan ki bym ioh iaki COV. Haba kren shaki lad pathai khubor ka nongialam jong ka Thma u Rangli-Juki (TUR) kaba dei ruh ka nongaibuit jong ka MGSPHSVA, ka Kong Angela Rngad, kala maham ba ki nongshong dukan madan ki lah ban pynjur ia ka jingiakhih lada ym lah ban pynlong noh mar mar ia ka jingialang jong ka PTVC.

“Ngi dawa ba ka PTVC ka dei ban shong jingialang noh mar mar ban khmih ia kikam jong kito kiba shah pynduh ia ki CoV watla ki dei kiba don hok ban ioh shong dukan madan ha Khyndailad. Lada ym lah, yn pynbor ia ngi ban pynjur ia ki jingiakhih” la ong Kong Angela. “Ki dang don bun ki nongshong dukan madan ki ba dang dei ban ai ia ki CoV. Kumno phi lah ban shu knieh noh ia ka kamai jong ngi da bun bun taiew?. Katno ka eh ia phi ban pynshisha ba ki dei ki nong shongdukan madan ba dei hok?. Namar kata, ka long kaba donkam ban khot iaka jingialang ka PTVC namar ia ka CoV ym lah satia ban shu ai da ka SMB. Lada ki khot ia ki briew shimet shimet, iathuh ia nga ba mano ban khang ia ki ban die ia ki CoV?. Ki lah ruh ban ai ia ka CoV sha ki briew ki bym dei hok. Namar kata, ngi ban jur ba kane ka kam ka dei ban iaid lyngba ka PTVC bad ba dei ruh ba buh bha ia kijingthoh namar ngim kwah ia kano kano ka bamsap ne ka jingleh shiliang ha kane ka kam” kala ong.

Ka Kong Angela kala pyntip ruh ba ka seng ki nongdie jingdie madan kala dawa ban shong pyrkhat biang ia ka vending zone bad ban pyn beit biang iaki jaka shong jong ki dukan madan kiba donkam tang khyndiat eh ki jaka ban die kwai ne um. Kala kynnoh ruh ba ka don ruh ka jingbamsap ha ka pisa bad ka bor ha ka jingtei ia ki dukan bad ki rynsan die jingdie jong ki nongshong dukan madan. Ki nongshong dukan madan kila kut jingmut ban pynbteng ia ka jingiashong kyllain mungor tad haduh ba ka SMB kala mynjur ban khot ia ka jingialang jong ka PTVC.