Ai por ka HYC 3 sngi ban plie

Ka HYC Lai Lyngdoh Circle hapoh ka jingïalam u samla Wandap Marwein, President jong ka Circle, ryngkat ki Nongniah Trok jong ka dong bad ka thain, ki la leit ban ïa kynduh ia u Project Manager jong ka Joint Stock Company TIER-1 kaba pyntrei ia ka surok Nongstoin–Wahkaji. Kane ka jingïakynduh ka dei halor ka jingpynslem ban plie ia ka jingkieng ba thymmai kaba pyniasoh ia ka shnong Mawthungkper bad Nongkynjang ha wah Kynshi.

Ka HYC ka la kynnoh ba katei ka company ba  pyntrei ia katei ka jingkieng ka la leh suki palat bad ka la kynjoh mynta la jan lai snem, hynrei ym pat lah ban plie paidbah ia ka. Ka jingbym shimkhia jong ka company ka la ktah shikatdei eh ia ki paidbah ka thain, namar ki kali heh kim shah ban iaid lyngba, bad la shah tang ia ki kali rit ban pyndonkam ia ka jingkieng ba rim. Ki paidbah ka thain ki la iai ud iai nam na ka por sha ka por ha ka seng halor ka jingpynslem jong ka conpany ban shah iaid noh ia ki kali lyngba katei ka jingkieng ba thymmai namar ka la buh jingeh baroh shikatta ia ka iaid ka ieng ki kali heh.

U samla Wandap Marwein u la ong ba ka seng ka dawa ba ka company kan plie noh mardor ia katei ka jingkieng ha kane ka sngi thohdieng bad lada kam lah, ka seng kan sa shim da kiwei pat ki sienjam ban pynthikna ba ka hok jong ki paidbah kan ym duh.