Wer ka Khooid Yaka Wah Myntdu ban iamih paidbah

Ka seng Khooid Yaka Wah Myntdu hapoh ka jingialam u Khroo Lamsalanki Pariat kum u President lem bad kiwei pat ki riew ryngbah dei kawei na ka seng kaba la iaid lynti kyrpang halor kumno ban pynneh pynsah bad ban iada ia ka Wah Myntdu na ki jingshah ktah ba bun rukom namar dei ka wah ba bsa umbam umdih ia ki paidbah nongshong shnong ka sor Jowai. Kumta ha u snem 2024 na ka daw ba la jur palat ka jingshah ktah ka wah Myntdu bad poi da ka umktieh sha man ki thliew iing na ka jingshna ia u surok bye pass uba pyniasoh na Treiongriang ha Khliehryrshi ka seng ha ryngkat ka jingmynjur lang u paidbah nongshong shnong ka la leit ujor syndon sha ka ïingbishar Meghalaya High Court kumjuh ruh sha ka National Green Tribunal NGT. Ha ka jingiaid lynti ka seng na ka liang ka Meghalaya High Court ka la pynkut noh ia ka mukotduma namar ba ka NGT ruh ka la shimti bad iaid shakhmat ia kane ka juh ka mat bad khamtam lei ba dei ruh ka mat ba kyrpang jong ka NGT.

Halor kane ka mat hynnin ka sngi u President ka seng Khooid Yaka Wah Myntdu u Khroo Lamsalanki Pariat u iathuh ba na ka liang ka NGT ruh ka la dep ban shong bishar la kumba saw san sien ei ei bad ha ka jingbishar jong ka pyrshah ia ka sorkar Jylla kumjuh ia u DC ka West Jaiñtia, ia ka Municipal Board ia u Executive Engineer PWD Jowai Central bad contractor, la poi ruh u pud ba ka NGT ka la wan jurip ia ka wah Myntdu lyngba ka joint committee central polution control board, ka Ministry of forest environment bad ka climate change regional office Shillong. Bad ka jingshong bishar ba khatduh ka NGT halor ka Wah Myntdu kan long ha ka 22 tarik mynta u bnai. Kumta ka seng ka khot ka wer ia ki paidbah nongshong shnong ba don sawdong ka Wah Myntdu sha ka jingialang paidbah ka ban sa long ha ka 9 tarik mynta u bnai ha Yungwalieh Chiliangraij ha ka por 1 baje nohphai sngi, bad ka khot kyrpang ruh naduh ki Dolloi ba hap ha u pud u sam ba iaid ka wah Myntdu, ki waheh shnong, ki nongialam Seiñraij bapher bapher bad kiwei pat ki riew pawkhmat ba kin ia wan ai jingmut lang bad ban ia pyrkhat ha katei ka sngi na ka bynta ka jingshong bishar ba khatduh ka NGT ka ban sa long ha ka 22 tarik.

“Kumba ia ka Wah Umkhrah ha Shillong ka sorkar ka la don jingthmu ban pynbha pynmiat da ka ban pynlut da ki phew klur, hato ia ka wah Myntdu ym lah mo ban leh kumjuh khamtam ba ka dei ka wah ba ai jingim ia u paidbah uba pyndonkam umdih na ka” ong u K.L.Pariat. Ha kane ka sngi na ka liang ki ar ngut ki riew ryngbah ba kynthup ia u J.M.Pohsngap bad bah Rupaia Lamar ruh ki la kyntu jur ia ki paidbah kiba don ka mynsiem jingsngewkhia halor ka jingshah thombor ka wah Myntdu kin sngewbha wan mih khlem pep sha katei ka jingialang.