Pynrem ia ka KHADC bad tnad Labour

Hadien ba ka sorkar Assam ka la nang bteng ban beh krat ia ki briew ki bym dei ki trai bad kiba la wan sah beain ha katei ka jylla, da ka jingsheptieng ba ioh kitei ki briew kiba shah beh kin rung bad bsuh shapoh ki shnong ki thaw kiba don ha khappud jong ka jylla Meghalaya bad ka Assam, mynta ka sngi ki nongialam jong ka Federation of Khasi Jaintia and Garo People (FKJGP) North Khasi Hills District lem bad ka Byrnihat Circle ki la khynra naphang ha ki jaka khappud khamtam ha ki karkhana kiba don ha ka thaiñ Byrnihat, Ri Bhoi District. Ha katei ka jingkhynra ha ki karkhana bapher, ki dkhot ka seng ki la lap bad beh krat noh ia palat hajar ngut ki nongtrei beain kiba trei khlem da don ki kot ki sla ba long katkum ka ain kum ka Labour License bad ka Police Verification ha kaba la beh krat noh ia ki sha ki jaka ba ki wan bad byrngem ruh ba kim dei ban rung biang shapoh Meghalaya.

Ia katei ka jingkhynra la ialam da u President ka FKJGP Byrnihat Circle, u samla Kitborlang Suting, ryngkat u General Secretary, u samla Noah Khongstit, u Vice-President, samla Debos Chyne, bad u General Secretary ka FKJGP North Khasi Hills District, u samla Ricky Majaw, lem bad kiwei pat ki dkhot ka seng. Ha ka jingkhynra, ka seng ka la lap ruh ba ki karkhana bad ki factory ha katei ka thaiñ ki la pyntrei ruh ia ki khynnah kiba dang hapoh ka rta 18 snem, kaba long pyrshah ia ka Child Rights Act katkum ki kyndon ka sorkar jylla. Haba kren sha ki Nongthoh Khubor, u Kitborlang Suting bad u Noah Khongstit ki la ong ba ka seng ka la pynlong ia katei ka jingkhynra hadien ba ki la ioh jingtip ba ki katto katne ki karkhana ki ai jaka sah ia kum ki nongtrei ia ki nongwan buhai shnong beain khlem da ioh ia ka jingbit na ki bor ba dei peit, kum ka Labour License bad ka Police Verification.

“Hadien ba ngi la lap ia palat hajar ngut ki nongtrei bar jylla ki bym don satia ia ki kot ki sla marmar hi ka seng ka la bthah ia ki ban leit phai bad ngi la ai ka jingmaham tyngeh ba kim dei shuh ban wan trei sha ka jylla khlem ki kot ki sla ba pura,” ong ki nongialam ka FKJGP. Ki la kynthoh tyngeh ruh ia ka Khasi Hills Autonomous District Council (KHADC) bad ka Labour Department jong ka jylla namar ka jingbym lah ban shimkhia ban peitngor bad ban khynra na ka por sha ka por halor ka jingdon jong ki karkhana kiba wanrah nongtrei bar jylla khlem da pynbiang ia ki kot ki sla kiba biang kaba lah ban buh jingma shikatdei ia ki shnong ki thaw bad ki nongshong shnong jong kito ki Shnong ba kine ki karkhana ki don. Ka FKJGP ka la ong ruh ba ka jingkhynra kan dang iai bteng bad kham pynjur hadien kane, namar ka jingartatien ba kito kiba shah beh na Assam ki lah ban rung sha Meghalaya bad ki lah ban leit trei kum ki nongtrei ha ki karkhana bapher bapher. Ki la maham tyngeh ruh ia ki company, karkhana bad ki industry ban kim dei ban wanrah nongtrei bar jylla ne ai kam beain khlem jingbit bad khlem ki kot ki sla ba pura, lada lap ia ka jingpynkheiñ ki trai jong kita ki karkhana kin hap shim ka jingkitkhlieh bad kin ngat ha ka kyndon kiba tyngeh.