Thaw ka sorkar lai ki Sub-Committee ban iakren bad ki District Council

Ka kynhun Myntri ka la rai ban thaw 3 tylli ki sub-committee ban iakren bad ka GHADC, KHADC bad JHADC halor ka jingthmu ka sorkar jylla ban siew tulop ia ki nongtrei ki District Council naduh u Naiwieng mynta ka snem. Haba iakren bad ki nongthoh khubor hadien ka jingialang ka kynhun myntri, u Myntri Rangbah u Conrad K Sangma ula ong, ka sorkar kan thaw ki sub committee bad ki sub-committee kin iakren ia ki 3 tylli ki District Council ka jylla bad kin ai ka kaiphot hapoh 45 sngi bad ka sorkar kan shim ka rai hadien ba la bishar bad pynshong nongrim ia katei ka kaiphod ki sub-committee. U Conrad ula ong, ba ki District Council ki don ka bor ban kyntait ia kine ki jingtyrwa, namar kam dei eh kaba long kongsan bad ka dei ka kam ba ia dei bad ka jingdon pisa tyngka jong ki Council, ula bynrap ka Sorkar kan ym tuklar ia ki rukom treikam ki District Council  kiba la pynkup ha ka Riti Synshar ka ri katkum ka khyrnitba hynriew ban iada khyndew ka shyiap, ka riti dustur bad ka hok tynrai ki trai shnong.

U la ong ka jingkylli kam mih satia bad kam don lynti ruh ia ka Sorkar Jylla ba kan leit mushlia ia ki kam ki ADC, namar ka Sorkar ka ai jingkyrshan pisa sha ki District Council, ba kynthup ia ka jingpynsiew ia ka tulop ki nongtrei bad kiwei kiwei.“Ngi don ka jingsngewkhia halor ka jingbym biang thikna ka pla tyngka jong ki District Council, kumta, ngin sa bthah ia ki District Council ba kin don ia u/ka Principal Secretary kiba lah ban dei ki Ophisar MCS ba la trei slem ne ki Ophisar IAS ban khmih halor ka rukom pyniaid ia ka pisa ka tyngka jong ki Council khnang ban pynthikna ba ka pisa ba ai, yn pyndonkam beit thik tang na ka bynta ka tulop bad ki jingpynkylla ha ka rukom pyniaid ia ka pisa pilain kum ka Service Rules, Financial Rules, Procurement Policy, kaba long kongsan namar ka thungkam thungjam bad kine kiei kiei baroh kidei kiba lam sha ka jingbym biang thikna jongka pla tyngka jong ki District Council” la ong u Myntri Rangbah.

Ula ong ba ka GHADC ka la iakynduh jingeh na ka jingkyrduh pisa, namar ka jingiapher ha ka jingpynmih bad ka jingpynlut ban siew ia ka tulop jong ki nongtrei bad ha u snem ba la dep, ka GHADC ka donkam T.70 Klur ban siew ia ka tulop katba ka jingpynmih ka long T.25 klur bad ka jingduna pisa ka long haduh T.40.45 klur.U Conrad ula ong, wat ka JHADC ka mad ia ka jingduna pisa bad kam lah ban siew ia ka tulop ki nongtrei, hynrei ka KHADC ka la kham biang ha kine ki 15-20 snem namar ba kam shym la thungkam palat ia ki nongtrei.