Shen yn iakren u Conrad bad u MR ka Assam ban sdang iakren pynbeit pud

U Myntri Rangbah ka Jylla u Conrad K Sangma hynne ka sngi ula ong ba ka jingiakren bad ka Assam halor ka phase-II jong ka jingiakren khappud ban pynbeit ia ki hynriew tylli ki jaka ba dang don ha ka jingiakajia, kan sa long shen, hadien bala dep bam smai ka Sorkar thymmai ha Assam.

Haba jubab ia ki jingkylli halor ka jingiaid ki kam ba ia dei bad ka jingiakren pynbeit pud, u Conrad ula ong ba kane ka kam kan sa sdang biang hadien ka jingpynsangeh kaba neh katto katne bnai.

“Ka Sorkar thymmai kala bam smai ha Assam. Kumta, ai ba kan iaid shuwa katto katne sngi. Ngan sa iakren bad u Myntri Rangbah ka Assam bad khlem pep ngin sa pyntyllun shakhmat ia ka jingiakren ha kine ki sngi ban wan” la ong u Conrad.

Ka jingiakren khappud jong ka wat kaba ar ka kynthup ia hynriew tylli ki jaka ba dang don hapoh ka jingiakajia hapdeng ki ar jylla-ka Langpih, Borduar, Nongwah-Mawtamur, Desh Doomreah, Block I &II bad ka Psiar-Khanduli.

Ka jingiakren pynbeit pud jong ka wat ba nyngkong kala long ha u Lber 2022 ha kaba baroh ar Jylla kila iasoi ia ka Memorandum of Understanding ha New Delhi ha ka jingiadonlang u Myntri kam pohiing ka Ri u Amit Shah, ban pynbeit noh ia hynriew na ki 12 tylli ki jaka ba don jingiakajia pud.

Kane ka soskular ka kynthup ia ka Tarabari, Gizang, Hahim, Boklapara, Khanapara-Pollangkata bad ka Ratacherra.

U Conrad ula pynpaw ba kane ka Sorkar ka don ia ka jingkut jingmut kaba skhem ban pyniaid shakhmat ia kane ka kam. “Khlem pep ngin sa pyntyllun shakhmat ia ka jingiakren ha kine ki sngi ban wan” ula iai ban.