Iaid kjat u samla na Jaintia ban dawa shah tih dewiong, pulom shah jingit bym ioh jingbit na ki bor District

U Samla Regeenal Shylla na ka thain East Jaiñtia Hills District hynne ka step ula iaid kjat na khyrdop State Central Library shaduh Malki Football Ground ban dawa na ka Sorkar Jylla ban shah ia ki paidbah ban tih dewiong katkum ka juk Traditional Scientific Mining hapoh ka Jylla.

Ha ka jingshisha u samla Regeenal ula thmu ban pynlong da ka jingiakhih shah thngan khlem pud sngi ha ha Madan Malki hynrei ki bor District ki la wan pynsngew ba um ioh jingbit ban pynlong jingiakhih ha East Khasi Hills bad la bthah pan jingbit na ki bor District ka East Jaintia Hills.

Naduh dang step u samla Regeenal ula ieng ha khyrdop State Central Library ha ryngkat ka Pla Card ban pynsngew ia ka jingeh ki paidbah namar ka jingshah khang tih dewiong hapoh ka Jylla khamtam ha rilum Jaintia Hills.

Haba kren sha ki lad pathai khubor u samla Regeenal ula ong, kane ka jingiakhih ka dei ban pynsngew sha ka Sorkar Jylla ban wanrah ia ki ain ban tih dewiong ba iahap katkum ka jinglong ka khyndew ka shyiap hapoh ka Jylla.

“Hoid nga mut ban shah thngan naduh mynta ka sngi hynrei ngam ioh jingbit. Hynrei kum u samla ba don ka jijgkitkhlieh na ka bynta ka ri bad ka jaidbynriew nga kloi ban bynda ia la ka jong ka jingim da ka ba shah jingit hynrei kaba sngewsih ka long ba ngam ioh jingbit” la ong u samla Regeenal.

U la ong ba mynta ka sngi u khlem phong wat tang ki slipar ban pyni sha ka Sorkar, katno ki paidbah ki jynjar, katno ki paidbah ha ka thain Jaintia Hills ki iap bad ki duk hynrei u Myntri Rangbah um lah ban iohi.

“Nga kwah ban pynpaw shaka Jylla baroh kawei haduh katno ki ba trei dewiong ki shem jingeh bad ngim tip sa katno ki paidbah kin iap thngan namar ka jingiai bteng ka jingkhang tih dewiong” ula ong.