Plie u MLA 3 tylli ki iingskul kynthup ‘U Soso Tham L.P School’ ha Mawryngkneng

Ki khynnah skul na ki lai tylli ki skul kiba don ha Mawryngkneng Constituency, ki la ioh sngewbha da ki kamra class bathymmai kiba la pynshna da u bah Heaving Stone Kharpran MLA ka thaiñ ia kaba la ioh ban khap ia u ribon kum ka dak ban plie thymmai noh ia ki kamra class.Kine ki skul ki kynthup ia ka Mawshbuit Presbyterian Secondary School, ka Jubilee Presbyterian Secondary School bad kawei pat ka skul kaba kham kyrpang bad kaba kham itynnad ka dei U Soso Tham L.P School kaba la ioh thymmai ka iingskul bad 5 tylli ki kamra kiba thymmai. Ha ka por mynstep u MLA u la khap ia u ribon jong ka kamra skul jong ka Mawshbuit Presbyterian Secondary School ha ryngkat ka jingsakhi lang ka kong I. Nongkhlaw kaba dei ka principal, u Pastor. D.A Kharkongor, nangta ki tymmen basan, ki nonghikai bad ki khynnah skul.Kane ka kamra skul ka dei kaba la shna na ka SRWP Scheme 2024-25 ha ka jinglut kaba 4 lak tyngka.

Ha ka por mynsngi, u MLA u la leit ban plie sa ia ka kamra skul bathymmai jong ka Jubilee Presbyterian Secondary School kaba dei ka skul ba la pyniaid da ka Jingiaseng Samla Presbyterian Mawryngkneng.Ha kane ka sngi la wan ban don lang u Tbn. F.R Tiewsoh, President ka Managing Committee, Rev. A.M Lawai, Headmaster ka skul, bah H. Khyriemmujat Chairman ka Jingiaseng Samla Presbyterian Mawryngkneng, bah F. Kharumnuid, Rangbah don ka Iapshyndiet, Bah S. Kharbihkhiew, Secretary ka Dorbar Shnong Mawryngkneng kiwei pat ki tymmen basan, ki nonghikai, ki kmie ki kpa bad ki khynnah skul.Na ka liang ki nongkren, ki la pynpaw ka jingsngewnguh bad ka jingkhublei ia u MLA ka thaiñ, uba la kloi ban synniang bad ban noh jingiarap da ka scheme sha kane ka skul kaba la lah ban ai jingmyntoi shibun ia ki khynnah pule.Ki la iathuh ba katba nang kiew ka jingbun ki khynnah skul, hynrei u MLA um ju kyntait haba ka skul ka donkam kano kano ka jingiarap bad u ju kloi ban kner jingiarap sha ka constituency baroh kawei.Khatduh eh, u MLA u la leit ban plie ia kawei ka iing skul bad ia ki 5 tylli ki kamra klas bathymmai na ka bynta ki heprit jong U Soso Tham Memorial L.P School kaba dei ka skul kaba nyngkong eh jong ka shnong Mawryngkneng baroh kawei kaba la plie ha u snem 1985.

Kaba sngewsih ka long ba kane ka iingskul ka la jot la pei thliew ki tnum bad watla ka dei ka skul na ka bynta ki heprit naduh nursery haduh class 5, hynrei kam don kano kano ka jingioh jingiarap tad haduh mynta ka kynti ba ki la ioh da ka scheme na u MLA ka thaiñ, u bah Heaving Stone Kharpran.Ha kane ka program, la don lang ka kong Baiahunlang Japang, kaba dei ka Secretary ka Managing Committee, bah Kelsin Kharsohmat, Rangbah Don ka Dorbar Dong Main Road, bah Amkitbok Lawai, President ka Managing Committee, ki kmie ki kpa, ki khynnah rit bad ki paid nongshong shnong kiba wan sakhi ia kane ka program.Ka kong Baiahunlang Japang, kaba dei ka Secretary ka Managing Committee ka la iathuh ba kaba sngewsih ka long ba man ba slap, ki tnum ki la pei lut, bad wat ki ben bad ki shuki ki jhieh lut bad ki khynnah ki jynjar bad sngewsih.Ka la iathuh ba la ioh ban kynduh ia u MLA ka thaiñ, bad khlem da pynslem u MLA u la phah ia ki briew ban peit ia ka iingskul bad kular ban leh eiei halor kane.Ka la iathuh ba na ka liang ki nongpyniaid, ki la pan tang da ka tnum iing ban pynbha, hynrei khlem poi pyrkhat ba u MLA u iarap syndon da ka iingskul kaba thymmai ba la shna da u cement kaba pyllait na u slap, ka lyer bad na ki bor jong ka mariang.La iathuh ba kane ka iingskul bathymmai kaba don 5 kamra la iarap lyngba ka DMF Scheme 2024-25 ha ka jinglut kaba 20,00,000 lak tyngka.