Ka sorkar ka don ka ‘Plan’ ban wanrah ki jingkylla ha ki ADC, ong u Bah Paul

U Myntri Sorkar uba dei ruh u nongialam ka UDP u Bah Paul Lyngdoh ula ong ba ka jingtyrwa ka Sorkar ban siew tulop ia ki nongtrei ki Autonomous District Council (ADC) ka dei ka plan iarap pisa ban wanrah jingkylla kaba thmu ban khanglad ia ka jingtyrkhong ka pla tyngka jong ki District Council. Haba kren sha ki lad pathai khubor u Bah Paul ula ong ba ka jingtyrwa ka Sorkar kam dei ka blank cheque (ka cheque bym kdew ia katno ka pisa) hynrei ka jingkyrshan da ka kyndon ba donkam ba ki ADC kin wanrah ia ka jingpynkylla ha ka rukom treikam.“Ka long kaba kongsan ban pyniapher hapdeng ka jingai pisa mon sngewbha bad kaei kaba dei ban leh. Kaei ba ka Sorkar ka tyrwa ka dei ka plan iarap pisa ban wanrah jingkylla namar ar tylli na ki ADC ki la hap iaksaid ha ka pisa tyngka. Lada ki dang iaid ha kane ka lynti treikam ba mynta bad ka jingpynmih pisa namar ka jingbun palat ki nongtrei, kin sa khyllem noh hapoh lai ne saw snem. Namar kata, shuwa ban poi katei ka khep, kane ka jingtyrwa ka long ban wanrah ka jingkylla ha ki rukom treikam ki District Council” la ong u Bah Paul.

Ula ong ka Sorkar ka la tyrwa ban kyrshan pisa ia ki ADC bad ma ki pat kin hap ban pynbeit ia ka jingdon ki nongtrei ban pynkhlain ia ka jingpynmih pisa bad pyntreikam ia kiwei pat ki jingpynkylla kiba donkam.U Bah Paul ula pyntip ka jingeh ka mih ba katto katne ki ADC ki la thung palat ki nongtrei bad kawei lei ka don ia ki nongtrei palat 1500 ngut. Ula ban jur ba ka jingkyrshan jong ka Sorkar ka dei kaba don bad ka kynhon ia ki ADC ba kin shim ia ka sienjam kaba dei ha kaban wanrah ia ka jingpynkylla ha ka rukom treikam bad ka jingpynmih pisa.“Nga iai ban ba ka dei ka sienjam kaba biang eh bala leh da ka Sorkar Jylla namar kumba phi iatip ba baroh ki ADC ki ju shaniah ia ka jingkyrshan baka Sorkar Jylla ka ai ha ki kum ka jingsam ia ka bhah khajna na ki marpoh khyndew bad kiwei kiwei. Ngi donkam markylliang bad ha kane ka kam, haba ngi iohi ba ki ADC ki jan poi sha u pud ban khyllem, ngi kwah ban tyrwa sha ki ia ka jingim bad kane ka dei ka jingim ba ka Sorkar ka tyrwa” ong u Bah Paul.

U Myntri ula pynpaw ruh ba ka jingthmu jong ka Sorkar ka dei eh halor ka jingpynbeit ia ka jingthung nongtrei bad ban pynthikna ba ki ADC kin don ia ka pla tyngka kaba biang.Une u Nongialam ka UDP ula niew ia kane ka sienjam jong ka Sorkar kum ka lynti kaba bha bad iaroh ruh ia ki jingthmu pynkylla dur ia ki ADC.Kat kum ka jingong jong u, ka Sorkar kam lah ban shu shong kli kti bad shu peit ba ki ADC kin khyllem, bad kane ka plan ban iarap bei pisa ka dei ka sienjam ba donkam ban khanglad ia kum kane ka jingmih.