Ka Jylla kan duh ia ki samla kiba long ka lawei ka Ri, lada ym lah ban tehlakam ia u drok

Ka tnad Social Welfare da ka jingkyrshan ka Ministry Social Justice & Empowerment, ka sorkar India hapoh ka National Action Plan for Drug Demand Reduction (NAPDDR), ka la lah ban pynlong ia ka workshop halor ka phang pdeng ‘Digital Dangers: How Cyber Crime Fuels Drug Abuse’. Ia kane ka workshop ba shisngi la pynlong ha Landmark Victoria Hills, Nongrim Hills, Shillong ha ryngkat ka jingiatreilang bad ka Drug Reduction, Elimination & Action Mission (DREAM) jong ka sorkar jylla, ki pulit ka Cyber Crime Division, Dreamzware Software Solutions, Hyderabad bad Kripa Foundation. Haba kren ha kane ka sngi ka kong Camelia Doreen Lyngwa, ka Director & Joint Secretary ka tnad Social Welfare kaba dei ruh ka Additional Mission Director jong ka DREAM, ka la kren halor ka jingjur jong ka jingdon ki briew kiba pyndonkam droks kaba la ktah ia ka imlang sahlang.

Ka kong Camelia ka la ban jur halor ka jingdonkam kyrkieh ban don ia ka jingiatreilang jong man uwei u nongshong shnonng, khnang ban lah ban rat dyngkhong ia u drok uba la jyllei ha kane ka jylla.“Ban iakhun ia u drok, kam dei tang ka kamram jong ka sorkar jylla hynrei donkam ban don ia ka jingiatreilang jong baroh,” ong ka kong Camelia. Ka la ong ba lada ym lah ban weng kloi ia kane ka jingeh ha ka por ba biang, kan don ka jingma ha kaba ka jylla kan sa duh ia ki samla, kiba dei ki lawei jong ka jylla.

Ha kane ka workshop la wan iashim bynta lang da ki Principal, ki nonghikai, ki tnad pule jong ki skul bad ki kolej bapher bapher  ryngkat ka jingdonlang ki kynhun sengbhalang, ki nongiasyllok ba shemphang nalor ki kmie ki kpa. Ka jingthmu jong kane ka workshop ka long ban ai ia ki jingtip ka ban long ka kum ka lad ban ai jingiada ban ialam ia ki samla ban lait na ki jingma.