Naduh 22 tarik ka GST thymmai, ai khublei u Conrad ia u Modi

U Myntri Rangbah ka Jylla Conrad K Sangma hynne ka sngi, ula wanrah ïa ka ‘suo motu’ hapoh ka ïing dorbar thawaiñ ha kaba ula ïaroh ia ka sorkar pdeng kaba la shim ia ka rai ban pynbeit ryntih ïa ka dor jong ka GST, ban ai jingmyntoi ia baroh ki nongshong shnong ka Meghalaya. “Nga kwah ban ai khublei ïa u Myntri Rangbahduh ka ri u Narendra Modi, ka Myntri pla tyngka ka Nirmala Sitaraman bad ïa baroh ki dkhot ka GST Council na ka bynta kane ka rai ba kongsan ka ban sah jingkynmaw ha ka histori.

Ia ka rukom pynsuk ba ar kyrdan kan pynkiew ïa ka jingpyllang pisa jong ki longïing bad ka jingïohnong kaba lah ban pyndonkam, namar ba bun ki mar kynthup ïa ki tiar ba donkam man la ka sngi kin kham jem dor. Kane ka rukom siew khajna kaba thymmai kaba ar kyrdan la khmih lynti ruh ba kan kyntiew ïa ki kam khaii namar kan pynsuk ïa ka jingbud ryntih bad kan kyntiew ïa ka jinglah ban ïakhun ki karkhana pynmih mar ka ri bad ka pyrthei,” la ong u Conrad Sangma ha ka sngi kut jong ka Dorbar Synrai.

Kane ka khajna thymmai kan sdang treikam naduh ka 22 tarik u Nailur mynta u snem bad ia katei ka jingpynbeit ryntih ia ka dor jong ka GST la mynjur ha ka jingialang jong ka GST Council ba 56, kaba la pyniaid da ka myntri pla tyngka ka sorkar pdeng. Ha kane ka jingpynbeit, la pynduh noh ia ka khajna kaba 12 percent bad 28 percent bad la wanrah ia ka rukom siew khajna kaba ar kyrdan ryngkat bad ka dor kaba 5 percent bad 18 percent, ryngkat bad ka jingsiew khajna kaba thymmai kaba 40 percent na ka bynta ki mar kiba rem dor bad ki jingdih kiba sniew.