Dawa ban ai da ka jingthoh halor ki mat jingdawa

Ka jingiakhih jong ki nonghikai Adhoc hapoh ka shatri Federation of All School Teachers of Meghalaya (FASTOM) ka la kynjoh saw sngi hynrei ki la rai ban bteng ka jingiakhih ha Madan Malki tad haduh ba ka Sorkar Jylla ka mynjur ïa ka jingdawa jong ki ban kyntiew kyrdan ïa ki skul adhoc sha ka deficit system.

Ia kane ka rai la shim hadien ba ka FASTOM dang shen ka la iakynduh ia u Myntri ka tnat Pule Puthi u Bah Lahkmen Rymbui, uba la pynpaw ba ka Sorkar kan bishar bniah ia ki jingai jingmut bapher ha kaba iadei bad ka jingthmu ban pynbeit ryntih ia ki kyrdan skul ha ka jylla shwa ban poi sha ka rai.

Haba iakren bad ki lad pathai khubor, u vice president ka FASTOM u Bah Sanborn Jungai u la ong ba ka jingtyrwa ka Sorkar Jylla da ka Meghalaya Education Grant (MEG) ka dang don hapdeng ka jingiakren bad ki nonghikai adhoc ki dang sah haka um dum haba ïadei bad ka jingpyntreikam ia ka.

“Kum ki nonghikai Adhoc ngim pat tip shisha la yn pyntreikam ne em iaka MEG, kumta, ngin bat skhem ïa ka jingdawa ba kongsan jong ngi kata dei ban kyntiew kyrdan ïa ki skul adhoc sha ka deficit system lane deficit pattern” la ong u Bah Sanborn.

U Bah Sanborn u la pynpaw ïa ka jingsngewsih halor ka jingbym don ka jingïakren kaba thikna na ka Sorkar watla ka FASTOM kala phah dorkhas haduh hynriew sien sha u Myntri Rangbah ka Jylla.

“Ngin iai bteng ka jingiakhih tad haduh ba u Myntri Rangbah un jubab ia ki jingdawa jong ngi” u la ong.

U Vice President u la kdew ba ka jingduna pisa ka ju shah kdew kum ka daw ban ym lah ban pynbeit ia ki jingdawa jong ki nonghikai adhoc lane kiwei pat ki nonghikai.

“(Hynrei), ngi tip tang kawei lada ka Sorkar ka don ïa ka “mon saiñ hima sima” ngam tharai ba ka jingduna pisa kan long ka jingeh,” u la bynrap.

Haba kylli, u Bah Sanborn u la ong ba ka FASTOM ka dawa baka Sorkar kadei ban ai da ka jingthoh ban pynthikna ba ka Sorkar kan pynurlong iaka jingdawa ki nonghikai adhoc. “Dei ban ai daka jingthoh ba ngin ioh ia ka Basic Pay ryngkat bad kiwei kiwei ki jingsiew” ula ong.

Nalor kane u Vice President ula dawa ba u Myntri ka tnad pule puthi lane u commissioner & secretary kidei ban pynsngew iaki jingdawa ka FASTOM sha u Myntri Rangbah ka Jylla.