Kurup drok heroin ba T.7 lak ki pulit na 2 ngut samla

Ka kynhun jong ka State Anti Narcotics Task Force (ANTF), Meghalaya ryngkat ka jingiatreilang bad ki pulit ka West Jaintia Hills , ki la ioh ban kurup 48.78 gram u drok heroin uba shong dor haduh T.7 lak ha ka jingkhynra ba la pyllong ha West Jaintia Hills District hynne ka sngi Saitjain.
Ia kane ka jingkhynra ki pulit ki la pyllong hadien ba ki la ioh khubor ba don ar ngut ki briew kiba wan hiar na Silchar sha Shillong, la suba ba ki wan ban shalan drok. Halor kane ka jingioh jingtip, ki pulit ka ANTF ha ryngkat ka jingiatreilang bad ki pulit ka West Jaintia Hills mar mar ki la sdang ia ka jingkhynra NAKA ha shi lynter ka surok bah jong ka NH-06 ha ka thain Phramer bad ha ka por kumba 8 baje mynstep, ki la pynsahngeh ia kawei ka bos kaba don ia u nombor ML-05-T-8381.
Kine ki arngut kiba la tip kyrteng kum u Robert Nongrum 33 snem u khun jong u (Late) bah Philip Thongni uba sah ha Umkdait, Nongmynsong, Shillong bad u Batskhemlang Jarain 32 snem u khun jong u bah J. Lyngdoh na ka shnong Umktait Block-III, Shillong.
Ha ka jingkhynra, ki pulit ki la lap ia ar tylli ki plastik sabon kiba la buhrieh hapoh ka jacket. Hadien kane ki pulit ki la leh ia ka tes ha katei hi ka jaka bad la lap ba ki dei ki drok heroin.
Katkum ka kyrwoh na u Superintendent of Police ka ANTF u Vikash Kumar, la ong kine ki ar tylli ki song ki khia 48.78 gram.
La iathuh ka jingtohkit ka dang iaid shakhmat ban lap ia ka thymmei bad ka jingthmu ban pynpoi ia kine ki mar beain ba la ioh kurup.
Na ka liang ka State Anti-Narcotics Task Force, Meghalaya, kan iaid shakhmat ban trei bad pynjur ia ka jingkhynra ban rat dyngkong ia u drok ha kane ka jylla.