Palat sanspah ki dieng la pom, ka Project Shillong Ropeway kan iaid shakhmat

Ka Tnat Tourism ka Sorkar Jylla hynne ka sngi ka la lum ka jingialang hapdeng ka Raid Laban Dorbar Pyllun ha ka jingdonlang ki Ophisar ka tnat PHE, Shillong Municipal Board (SMB) bad Forest ban pynshai halor ka jingpyrshah ia ka Project Shillong Ropeway.
Haba kren sha ki lad pathai khubor ka Joint Secretary ka tnat Tourism ka Kong RM Kurbah ka la pynshai ha ka jingiaid lynti ban sdang ia ka Project Shillong Ropeway, la pom thik 544 tylli ki dieng kiba don hapoh ka jaka jong ka tnat Forest.
Ka Kong Kurbah ka la iathuh ba katkum ki kyndon ain, hadien ba la pom ia ki dieng, hap ruh ban thung ar shah bad ia ka bai tynrai dieng ruh hap lut na ka Sorkar lane ka tnat ba pom ia ki dieng.
Ka la pynshai ba ia ki 544 tylli ki dieng la pom ha ki 6 tylli ki jaka ba don ki Tower (Station) bad kine ki jaka ki heh 12 meter x 12 meter.
Ka la bynrap ka Sorkar ka kyrpad ruh ia ki nongshong shnong ka Riat Laban ba lada ki don ki jaka ba lah ban pyndonkam ban thung dieng, ka tnat Forest ka kloi ban ai shuh shuh ki tynrai dieng ban thung.
“Hadien ba la iasyllok bad ka tnat PHE, SMB bad ki Dorbar Shnong la ioh jingshai ba ki jaka ba don ka jingpom dieng, kim dei ba don tyllong um bad dei namar kane ka Sorkar ruh ka la shah ban pyniaid shakhmat ban tei ia ka Shillong Rope Way Project” la ong ka Kong Kurbah.
Ka la pynshai ba ka tyllong um ba don ka long kham shakhmat sha Lawsohtun, shaduh palat ka Nepali School bad kam don jingïadei satia bad ka bynta bad ka 800 meter ba dei ka bynta ba shna ïa ka projek.
“Ka Project kam dei ban ktah ïa ka tyllong um ne ïa ka mariang, hynrei ka don ka jingthmu ban pynitynnad shuh ïa ka jaka bad ban kyntiew ïa ka kam jngohkai pyrthei hapoh ka Jylla” ka la ong.
Haba ia dei bad ka jingsngewkhia ioh don ka jingtwa khyndew hadien ba pom ia ki dieng, ka Joint Secretary ka tnat Tourism ka la ong ba ki Engineer ki la dep pynshai ba yn leh ïa ki kam pynbha pat lane (Restoration bad Slope Protection) ban ïada ïa ka jaka.