Pynkup burom ka RLSSCO ia 444 ngut ki samla pule

Donkam ban trei shitom ban poi 100 percent ka Literacy Rate ha Meghalaya

Shillong, Nailur : Ka Raid Laban Sports, Social and Cultural Organization (RLSSCO) hynne ka sngi ka la pynkup burom ia ki samla pule ka thain South Shillong constituency kiba wan shakhmat ha la ki eksamin bapher bapher.

Ha kane ka sngi ka RLSSCO ka la pynkupburom iaki 444 ngut ki samla pule napoh ka South Shillong constituency bad la sam ruh 77 tylli Laptop sha ki samla pule kiba wan shakhmat eh.

Ia ki khusnam bad ia ki Laptop la sam da u Symbud Myntri Rangbah ka Jylla u Bah Prestone Tynsong ha ka jingdonlang u Myntri ka tnat Arts and Culture u Bah Sanbor Shullai uba dei ruh u MLA ka South Shillong constituency, ki Principal, ki nongialam shnong bad ki samla pule.

Haba kren ha kane ka sngi u Bah Prestone ula iaroh ia ka sienjam ba ka Raid Laban ha ka jingialam u Bah Sanbor ka shim ban pynkup burom ia ki samla pule da kaba ong, ba kane kan nang ai mynsiem ia ki ban nangleh bha shuh shuh ha la ki jingpule.

U Bah Prestone ula ban jur ba ka long kaba donkam ia baroh ki MLA ban bud nuksa iaka sienjam jong ka Raid Laban khnang ban kyntiew shuh shuh iaka pule puthi ha baroh kawei ka Jylla Meghalaya.

U la ong baka Literacy Rate jong ka Meghalaya ka dei tang hapdeng 91%-92% namar kata donkam ban kyntiew shuh shuh ia ka pule puthi jong ka Meghalaya.

“Ngi donkam ban treikam kham bha shuh shuh ban pynpoi 100% ka Literacy Rate jong ka Meghalaya namar kata nga kyntu iaki samla pule ban nang trei shitom bad nga kyntu ruh iaki nongpyniaid skul ban ai ka jingshakri kaba thikna ia baroh” la ong u Bah Prestone.

Haba ban jur baka Sorkar Jylla ka ialeh ban trei bha naka bynta ka jingmyntoi ki paidbah bad ka Jylla baroh kawei, u Symbud Myntri Rangbah ula ong “Mynta ka kynti ki paidbah ki lap miet tang ban kynnoh iaka Sorkar lada jia kano kano ka jingjia hynrei ka Sorkar kam sngap iaki ba kynthoh kan nang iai trei ban myntoi lang baroh”.

Na ka liang u Myntri ka tnat Arts and Culture u Bah Sanbor Shullai uba dei ruh u MLA ka South Shillong constituency haka jingkren u kyntu iaki samla pule ban nang trei shitom khnang ba kin ioh kheit ia u soh ka jingjop haki sngi ban wan.