Bthah ka Sorkar ia ka tnat Social Welfare bad ka koit ka khiah ban buh jaka sumar na bynta ki nongdih drok man ki district

Ka Sorkar Jylla kala bthah ia ka tnat ka koit ka khiah bad iaka tnat Social Welfare ban buh ki jaka sumar kyrni Drok lane kawei ka Detox bad kawei ka De-addiction Centre ha baroh ki nongbah District jong ka Jylla Meghalaya. Ia kane ka rai la shim ha ka jingialang jong ka DREAM Mission ba khlieh da u Myntri Rangbah ka Jylla u Conrad K Sangma ha ka jingdonlang u Director ka DREAM, u MLA Bah Paul Lyngdoh bad ki heh ophisar naki tnat treikam ka Sorkar bad ki kynhun bapher bapher.Haba kren shaki lad pathai khubor u Myntri Rangbah ka Jylla u Conrad K Sangma ula iathuh ba ki don bun tylli ki nongbah District ha kylleng ka Jylla ki bym don jaka sumar kyrni Drok kum ki Detox bad ki De-addiction Centre. U Conrad ula iathuh baka Sorkar ka la bthah iaka tnat Social Welfare bad ia ka tnat ka koit ka khiah ban wad bniah bad bishar bad ban shim ki sienjam ban buh ki jaka sumar kyrni Drok.

“Ngi la bthah ba iaki jaka sumar kyrni Drok kum ki Detox bad ki De-addiction Centre dei ban buh haki jaka sumar (Hospital) Sorkar lane ha ki jaka sumar riewshimet ne haki jaka jong ki kynhun niam lane ki jaka jong ki kynhun trei mon sngewbha” la ong u Conrad. U Conrad ula iathuh ba la bthah iaka tnat Social Welfare bad ka tnat ka koit ka khiah ban pynthikna ka jingdon ki nongtrei lane ki nongsumar ha ki Detox bad ki De-addiction Centre. “Ngi ka shim ruh iaka rai ban ai jinghikai Doctor bad ki Nurse kumjuh ruh iaki nongtrei ki ban ai jingsumar iaki ba kyrni Drok haki Detox bad ki De-addiction Centre bad ngi kyrmen ba hapoh lai bnai ngin lah ban buh kawei ka Detox bad kawei ka De-addiction Centre ha baroh ki nongbah District jong ka Jylla Meghalaya” ula ong.

U Myntri Rangbah ula iathuh ba haka jingialang kala don ruh ka jingai jingmut ban thaw daki Standard Operating Procedure (SOP) ha kaban pyniaid bad pyntreikam iaki Detox bad ki De-addiction Centre bad kumno ki Dorbar Shnong ki lah ban don bynta haka jingïakhun pynduhjait ia u Drok. Ula iathuh ruh baka Sorkar kala bthah iaka tnat Pulit ban shim ki sienjam ba tyngeh ha kaban khynra Drok haki jaka lane haki Hotspot ba jur ka jingkhaii Drok. “Haki sngi ban wan ki Pulit kin sdang ka jingtalasi bad khynra kynsan kynsan haki jaka ba jur ka jingkhaii Drok” ula ong.