Pyndam noh ka sorkar ia ka jingthmu ban ai pyniaid ia ki kynhun shimet ia ka Tura Medcal Kolej

U Myntri Rangbah ka Jylla u Conrad K. Sangma hynne ka sngi ula ong, ka daw ba ka sorkar jylla ka la rai ban pynsangeh noh ia ka jingthmu ban pyniaid ia ka Tura Medical College da ka Public Private Partnership ne PPP mode ka dei namar ka jingsngewkhia bad ka jingpyrshah jong kiba bun balang. Haba iakren bad ki nongthoh khubor u Myntri Rangbah ula ong, ba ka sorkar ka la rai namar ba ki don ka jingsngewkhia namar ka jingpynpaw ki katto katne tylli ki kynhun halor ka jingtyrwa ban pyniaid ia katei ka college da ka jingiatreilang ka sorkar bad ka kynhun shimet ne PPP Mode.

 “Ngin sa khmih bniah ia kiwei pat ki lad, kumno ba ngin lah ban pyntreikam noh ia ka college” la ong u Conrad bad ka pynshai ba ka sorkar kala tyrwa da ka PPP mode ban pyniaid ia ka Tura Medical College namar ka jingeh ha kaba iadei bad ka jingbym don ia ki riewstad ne ki briew kiba la tbit bha ha katei ka kam. Ula iathuh ba ki la tyrwa ban iatreilang bad ka kynhun shimet ka ban long kum ka lad ban sdang ia ka Medical College ha Tura, hynrei namar kiba bun ki kynhun ki pyrshah jur ia katei ka jingthmu, kumta ka sorkar ka la pdiang ia ka jingsngew bad ia ki jingai jingmut ki jong ki.

 “Ngin sa shimkhia lang bad baroh kiba don bynta lang ryngkat bad ki paidbah bad wad ia ki lad ki lynti kumno ba ngin lah ban pyniaid noh ia ka Medical College” ong u Myntri Rangbah bad ula bynrap ka sorkar ka ieng skhem ban pynthikna ba ka Tura Medical College kan long ka jaka pule kaba kongsan bha.