Don ki nongialam ba kwah weng kum u President MPCC, ong u Pala

U Nongialam ka Congress ha Meghalaya u bah Vincent H. Pala ula kubur ba ki don katto katne kiba kwah ban weng noh ia u kum u President ka Meghalaya Pradesh Congress Committee (MPCC). Haba kren sha ki lad pathai khubor, u bah Pala ula ong ha ka party ki don beit kiba kwah ban weng ia u bad don kiba kwah ba un dang neh bad ki don ruh ki briew kiba la phet na ka party, ki lah ban pyndonkam bakla ia ki briew jong ki ban pynshit ban weng ia u. “Ka shuki President ka don tang kawei, kin don beit kiba mon bad kin don ki bym mon. Ka party jong ngi mynta ka don ha ka liang pyrshah, ki briew bun ba la phet hynrei kin don hi ki briew jong ki, kiba dang sah ha ka party ba kin pyndonkam bakla ia ki briew jong ki,” ong u bah Pala.

Ula ong ba ha ka jingialang hynnin kaba donlang u heh ka AICC uba peit ia ka Meghalaya, don kiba ong ba dei ban shim ia ka rai ban khang ban kren ia kane ka jingpynpaw pyrshah ban weng ia u hynrei na ka liang jong u, um shah namar ha ka party kaba don ka synshar paidbah, ki lah ban pynpaw ia kano kano ka jingsngew jong ki.Ula ong hadien ka jingialang ki don kiba la pynsngew ia ka jingkwah jong ki ban pynthymmai nongkitkam party kum ha ki District bad ki Block Level. Halor ka jingpynsngew jong ki, ula kular ban shim khia bad ula pan jingbit ruh na ka party na ka AICC halor kane. Ha kajuh ka por u bah Pala ula iathuh ruh ba don ruh ki paralok kiba la long khreh ialade haduh 90 percent ba kin leit iasoh noh sha ka BJP hynrei mynta ki dang don bad ka party Congress namar ba kim pat ioh ia ka daw ban mih na ka party.

“Don ki paralok kiba la pynkhreh bha ialade ban leit iasoh bad ka BJP hynrei ia mynta ki dang don ha ka party jong ngi namar ba ia mynta ki dang hap ban shna daw ban kynnoh iano iano khnang ba lada ki leit ban iasoh sha ka BJP kin long kum ki briew kiba khuid ba shida,”ula ong. Shuh shuh u bah Pala ula iathuh ba u bah Pynshngain N Syiem hynnin ka sngi ula kynduh ia ki nongialam ka AICC bad ki la bthah ia u ban iatreilang bad iatylli ha ka party. Katkum ka jingiathuh u bah Pala, u bah Pynshngain lehse u lah ban sngewdom ia u namar ba ha ka por ba ki kwah ban iathaw lang ha ka EC bad ka NPP ha KHADC, um shym la shah ba kin iatreilang hynrei hadien ba ki la pyneh ba ki kwah ban iatreilang bad ka NPP bad na ka liang jong u kum u President ka MPCC ula u shu sngap noh. “Kawei kaba u bah Pynshngain u sngewsih ia nga, ka long namar ba ngi weng ka jingiatreilang bad ka NPP. Hynrei kane ka dei kam dei ka mon jong nga, ka dei ka mon jong ka AICC,” ula ong. U la bynrap ruh ba ka daw jong ka jingshah rem jong ka Congress ha ka ilekshon MDC ha KHADC ruh ka dei namar ba ka Congress ka la iatreilang bad NPP.