Ka jingjia ha wah Umngot ka pynduhnong ia ki nongshong shnong

KaTourism Societies hapoh ka Darrang Elaka kaba kynthup ka Darrang Tourism Promotion & Development Society, ka Shnongpdeng Tourism Development Society bad ka Dawki Tourism Development Society ryngkat u Dalloi bad ki nongialam ka Elaka, hynne ka sngi ki iakynduh ia u Symbud Myntri Rangbah ka jylla u bah Prestone Tynsong ban pynsngew halor ka jingeh kaba ki la mad na ka jingjngut ka um ha wah Umngot.

Ha katei ka jingiakynduh, ki la pynsngew ia ka jingeh namar kum ha kane ka por tlang ba rkhiang ka suid bneng, ym ju don ka jingjngut ka wah Umngot, hynrei dei tang ha une u snem ba mynta kane ka wah ka la jngut bad ka la wanrah ia shibun ka jingduhnong ia ki nongtrei kiba im bad kamai jakpoh na kane ka wah. Katkum ka jingong ki nongialam jong katei ka kynhun, ka daw kaba la pynlong ia kane ka jingjngut ka wah, ka dei namar ba la wan na ka jingtrei surok Shillong Dawki ha ki thain sharum Laitlyngkot kaba ioh lehse don ka jingtheh khyndew ha ki ki wah kiba la poi shaduh Dawki.

Na ka liang kitei ki nongiala ka kynhun ki la pynpaw ba kim pyrshah ia ka roi ka par ban shna surok hynrei kila kyntu ia ka sorkar haba don kino kino ki jingeh ban thaw lad ban pynbeit bad halor kane ka mat. Halor kane, na ka liang u bah Prestone Tynsong, u la kular ba un shimkhia mardor ban thaw lad ban pynbeit ia kane ka jingeh.