Pynrem ki sengbhalang ia ka sorkar, yn bteng jingiakhih ka MCTODA

Ka Hynñiewtrep Integrated Territorial Organization (HITO) hynne ka sngi ka la byrngem leit tur ha Secretariat lada ka Sorkar kam pyllait ia ki nongialam ka Meghalaya Commercial Truck Owners and Drivers Association (MCTODA). Ïa kane ka jingbyrngem ka HITO la pynsngew da u President u Bah Donbok Dkhar hadien ka jingleit jong ki sha Mawryngkneng ban ai mynsiem ia ka MCTODA kaba dang don hapdeng ka jingïakhih.Haba kren sha ki lad pathai khubor u Bah Donbok ula ong, ba kane ka jingbom ki pulit ïa ki nongñiah trok dei beit ka jingbthah jong ka Sorkar Jylla.

U Bah Donbok u la ong ba ki pulit ki la kem ruh ïa ki nongïalam ba kynnoh ba ki la pynsangeh ïa ki kali bad pynsah kut lut ïa ka ïaid ka ïeng ki kali hynrei u la buh jingkylli ruh ba kito kiba shong scooty khlem phong helmet, hato ki la dep siew ne-em ïa ka bai kuna.“Lada kim pyllait ïa kine ki nongïalam ka MCTODA ba la shah kem, ngin sa leit ban ïakhih ha ïing lajong kata ha Secretariat” la ong u Bah Donbok.

U Bah Donbok u la ong ruh ba teng-teng para briew ngim ju ïa itynnad hynrei haba ka jaitbynriew ka dawa ngin hap ban ia mih lang bad kata ka dei ka mynsiem ieid jaitbynriew. “Ka la mih ka kyntien kaba kren ba balei haba dei ba ïakhih ha Jaintia ki wan ïakhih sha Khasi Hills. Lada phim pyllait ia kine ki nongïalam jong ka MCTODA, ngim banse ban leit ïakhih syndon ha Secretariat” u la bynrap.