Ai khublei u MLA ïa ka sorkar pdeng bad sorkar jylla halor ka Jan Jatiya Gaurav Diwas

Ïa ka lyngkhuh sngi kha ba 150 snem jong u Bhagwan Birsa Munda, u nongialeh laitluid riewlum ba pawnam na Jharkhand, la rakhe da ka jingburom kaba khraw ha Ïing Dorbar Sohryngkham kum shibynta jong ka prokram Jan Jatiya Gaurav Diwas ha ka ri baroh kawei. Ïa kane ka prokram la pynlong da ka Ophis u BDO, Mawryngkneng C&RD Block.Ha kane ka sngi, u MLA ka 13-Mawryngkneng Assembly Constituency bah Heavystone Kharpran u la long kum u Kongsan uba la pynpaw ïa ka jingsngewnguh kaba khraw ïa baroh ar tylli ki Sorkar Pdeng bad Sorkar Jylla kiba la burom ïa ka pateng jong u Birsa Munda bad ïai bteng ban aiti ïa ka bha ka miat jong ki riewlum.
Kawei ka bynta ba kongsan jong kane ka prokram ka long ka jingplie online bad jingbuh mawnongrim ïa ka Skul EMRS (EMRSA) ha Shnong Sohryngkham, ba la pynïaid da u Myntri Rangbahduh ka ri India ba donburom, u Narendra Modi, ha ka jingïadon lang u MLA ka thaiñ bad ki riew rangbah.Haba ai jingkren u MLA u la ai ka burom ia u Bhagwan Birsa Munda, da kaba pynkynmaw ia ka jingiakhun shlur jong u ia ka British East India Company. U la ring ruh ia ka jingiasyriem bad ki riewshlur riewlum trai shnong kum U Tirot Sing, U Kiang Nangbah, bad u Patogan Sangma, kiba kumjuh ki la ialeh ban iada ia la ka khyndew ka shyiap bad ki briew jong ki.
Shuh shuh u MLA u la kynmaw burom ïa ki nongïalam ba pawkhmat jong ka Jylla Meghalaya kiba kynthup ïa u GG Swell, u JJM Nichols Roy, u B.B Lyngdoh, u Purno A. Sangma, u Hopingstone Lyngdoh bad bun kiwei pat kiba ki jingnoh synñiang jong ki ki la long ki atiar ban ïada ïa ki hok riewlum bad ban pynskhem ïa ka jinglong Jylla jong ka Meghalaya.Haba pynpaw ïa ka jingsngewnguh kaba khraw, u MLA u la ai khublei ïa u Myntri Rangbah ba donburom jong ka jylla Meghalaya uba la pdiang ïa ka jingtyrwa jong u ban pynrung ïa ka Shnong Sohryngkham ha ka projek skul EMRSA.U la ong ba u la pynpaw bunsien ia kane ka mat ha ka iing dorbar thawain ka jylla Meghalaya. U la pynpaw ruh ïa ka jingsngewnguh kaba khraw ïa ka tnad Tribal Affairs kaba la wanrah ïa kane ka projek, bad ïa ka Local Dorbar jong ka Sohryngkham kaba la ai ka jingïatreilang kaba khlem sangeh.Ha kane ka sngi la wan ban ïashim bynta da ki nongïalam bad ki nongmihkhmat ba kongsan jong ka imlang sahlang, ba kynthup ïa u Bah Donbor Kharmujai, u Sordar Shnong ka Sohryngkham, u Bah Kiswell Kharkongor, u Secretary bad ki dkhot ka Seng Samla Sohryngkham, u Local MDC ka 6-Sohryngkham Constiteuncy, Bah B.Wankhar, U BDO ka Mawryngkneng Block ryngkat bad ki nongtrei jong u, bad ki ophisar na ka MBDA.