Yn pyndep ia ka iing Dorbar thymmai ha u Jylliew, ong u Lamphang

U Lamphang ka ïingdorbar Thaw Aiñ ka Jylla u Thomas A Sangma hynne ka sngi ula lum ia ka jingialang halor ka jingshna ia ka iingdorbar bathymmai ha Mawdiangdiang, New Shillong Township bad ula pynbna ban pyndep ia ka ïingdorbar ha u bnai Jylliew 2026. Ha kane ka jingialang kaba la lum da u Lamphang la wan iashim bynta da u Symbud Myntri Rangbah uba khmih ia ka Parliamentary Affairs u Bah Prestone Tynsong, u Commissioner and Secretary ka Meghalaya Legislative Assembly u Bah Andrew Simons, ki heh ophisar na ka tnad Finance, Parliamentary Affairs, PWD (Buildings), NIC Meghalaya bad ki heh ophisar jongka Meghalaya Legislative Assembly Secretariat.

U Lamphang ula iathuh ba katei ka jingialang kaba la lum ka la khmih bniah ia ka jinglong jingman ia ka jingtei bad ban shimkhia ia ki mat kiba iadei bad ka jingpyntreikam ia ka projek. U Lamphang ula pynpaw ba ka jinglum man la ka bnai ia ka jingialang ka la long kaba iarap bha ban khmih bniah ia ki kam bad ka jingiaid shaphrang jong ka jingtrei.“Nga sngewkmen ban pyntip ba ka jingialang kala long kaba seisoh. Da ka jingpynlong man la ka po ria kum kine ki jingialang ban bishar kam, ngi la lah ban peitngor bha ia ka jingiaid ki kam bad ban ithuh ia kiei kiba donkam ban leh ban pyniaid iaid shakhmat ia ki kam ki jam” la ong u Thomas Sangma hadien ba la wai ka jingialang.

U Lamphang ula iengskhem biang, ba ka por ban pyndep ia ka Assembly Hall ka dei beit kaba dang neh hi kumjuh, ha kaba la buh ia u bnai Jylliew 2026 kum ka thong bad ula bynrap ba mar syn pyndep ia ka Main Hall, ia ka Dorbar lah ban pynlong noh ha kane ka ïingdorbar kaba thymmai. U Thomas Sangma ula pyntip ruh, ba un sa leit ban jurip ia katei ka project ha ka 11 tarik u Nohprah ban peit hi dalade ia ka jingiaid ki kam bad ka rukom long  rukom man jong ka jingpyntrei ia ki kam.