Ki jingtei ba ia dei bad ka kolshor kin nangpynkhraw ia ka shad Nongkrem

Ka sorkar jylla lyngba ka tnad Jngohkai hynne ka sngi, ka la plie ia ki jingtei ba ia dei bad ka kolshor bad kam jngohkai na ka bynta ka shad Nongkrem ha Lum Pomblang bad ha Madan Syiem, Smit. Ha kane ka prokram la iadonlang u Myntri Rangbah ka jylla u Conrad K. Sangma, u Symbud Myntri Rangbah ka jylla u Bah Prestone Tynsong, u CEM barim ka KHADC u Bah Pyniaid Sing Syiem, u Syiem ka Hima Khyrim u Dr. B. S. Syiem, ki nongialam ka thain kaba kynthup ia ki Longsan Mansan, Sordar bad ki Rangbah Shnong. Ha kane ka prokram la pyninam ruh ha kaba ia dei bad ka kolshor bad ka jingioh ia ki jingpynbyrngia na ka kynhun tem jong ki khynnah pule ka Smit Higher Secondary School bad Smit College. Haba kren ha ka jingialang u Myntri Rangbah ula pynpaw ia ka jingkongsan ban pynneh pynsah bad ban kyntiew ia ka jingriewspah ka kolshor barim bajah bad haba pynpaw ha ka jingleit ha ka sien kaba nyngkong ha kine ki 3 snem shiteng kiba la dep, ha kaba ula sakhi ia ka jingriewspah jong ka lehniam leh rukom jong ka shad Nongkrem, ula pynpaw ba wat hapdeng jong ki phew snem jong ka jingioh ia la ka jong ka jylla, ka jingithuh pura ia ka jinglong tynrai ki kolshor jong ki paid riewlum kam dei satia kaba la pynneh pysnah pura bha.

 “Nga kren ia kane ym kum ka jingkynthoh hynrei kum ka jingpynsngew. Ha katei ka khyllipmat. Nga don ia ka jingsngew ba ia kane donkam ban pynkylla. Nga la iengskhem ba ngi ngin leh ia kaei kaei kaba donkam ha kaban leh ban ai ia ka burom ia ka riti dustur bad koslhor, ban iaida, pynneh bad ban kyntiew ia ki” ula ong bad ka pynpaw ia ka jingkmen ban sakhi ia ka jingseisoh ha kaban shna pyndep ia ka projek bad ong, ba ki kam pynroi kiba la leh nalor jong ka madan shad, ryngkat ka jingpynitynnad ha ki jaka kiba marjan ruh ka dang iaid kaba kynthup ia ka Madan Syiem bad kiwei kiwei ki madan ha katei ka shnong. U Myntri Rangbah ula kren ruh shaphang ka jingiapait iapra ha ka imlang sahlang bad ula kyntu ia ki paitbah ba kidei ban iaid shakhmat da ka jingiatylli lang bad ula banjur ba ka jingkiew ka roi ka par dei ban thew da kaba jingktah ka jongka ia ka jingim jong ki paidbah

Na ka liang u Bah Prestone Tynsong ula pynpaw ba kane ka sienjam ka pyni shai ia ka jingkular ka sorkar na ka bynta ka roi ka par kaba salonsar bad ka jingkiew shaphrang bad ula pynbna ba ka sorkar ka don ia ka jingthmu ban pynitynnad ia ka Iewduh Market ban pynsuk ia ki paitbah bad ia ki briew kiba wankai na kiwei pat ki jylla. U Syiem ka Hima Khyrim ula ong, ba ka jingshna ia kine ki kam pynroi ka dei kaba la mih na ka jingtrei shitom bad ka jingiatrei lang bad pynpaw ia ka jingsngewnguh ia ka sorkar kaba la bat skhem ia la ka kular ban pynthikna ba kane ka projek kan iaid ha ka lynti kaba dei bad ula ban jur ia ka jingkongsan ban pynneh pynsah ia ka khyndew ka shyiap, ka kolshor bad ia ka jinglong tynrai.