Shi snem 144 sngi pep kam u Prof. PS Shukla ban leit shangkai: NEHUTA

Ki nonghikai ka North Eastern Hill University Teachers Association (NEHUTA) ki la pynpaw ka jingsngewkhia halor ka jingleh bym suidniew ka tnad Pule Puthi ka sorkar pdeng haba ia dei bad ka jingdawa ban weng noh ia u VC u Prof. PS Shukla na ka kam. Ka NEHUTA ha ka kyrwoh ka pdiang ia ka jingshah weng noh jong u Prof. S. Singh u VC ka Tezpur University na ka kam namar ba dang iaid ka jingtohkit pyrshah ia u. Na ka liang ka NEHUTA ka kyntu ia ka tnad ka sorkar India ba ka dei ban weng noh mardor bad ka dei ban thung thymmai noh ia u VC ha NEHU.

U President ka NEHUTA u Prof. Lakhon Kma ula ong ba ki jingkynnoh bad ki jingleh jong u Prof. Shukla kam iapher bad u Prof. Singh, kynthup naduh ka jingpep na ka kam. La ong ba u Prof. Shukla um shym la don ha ophis kumba 3 sngi ha ka shi taiew kaba la long kumba 144 sngi ka jingpep jong u na ka kam ha ka shi snem, ka jingleit shang kai nalor kiwei de, khlem kino kino ki daw ka long tang ban shu pynsep ei ia ka pisa TA/DA. Ula ong ba ka jingbym shim khia jong u, ka la pynhiar kyrdan ia ka skubah bad kumjuh ia ka pule puthi bad um ju rah ne leh eiei ia kino kino ki jingeh ba ki samla pule ki iakynduh ne ki nonghikai.

Ha kajuh ka por, ka NEHUTA ka la ong ba ka NEHU kam donkam ia Pro VC, hynrei ki la dawa ba ia ka kam VC dei ban shimti da ki Proffessor ba la kham rangbah ha ka kam. La ong ba u Prof. P. S. Shukla, watla u shym la wan trei ha NEHU, hynrei u ioh lut beit ia ka tulop. Namar kata ka NEHUTA ka kyntu ia ka tnad  ba kadei ban weng noh mardor bad kadei ban thung thymmai noh ia u VC ha NEHU.