Byrngem VPP ban khang tala ia ka ophis JHADC, lada ym siew tulob ia ki nongtrei hapoh 16 tarik

Ka Voice of the People’s Party ha ka jinglamkhmat ki nongialam na West bad East Jaiñtia Hills District lem bad ki MDC VPP ka JHADC hynne ka sngi ki la leit buh jingthoh ha u CEM bah Thombor Shiwat ban dawa siew dep noh ia ka tulop ki nongtrei na bynta 9 bnai ba la kot sha ka T.8 klur. Haba kren sha ki lad pathai khubor hadien ka jingleit ai ia ka shithi u Jamshaphrang Pohtam MDC VPP na ka War Central u ong, ka tnat DCA ka sorkar jylla bad ka Executive Committee jong ka JHADC ka dei ban pynshai ia ka daw bym lah siew tulop kaba la pynsohsat ia ki nongtrei ha kine ki khyndai bnai bad la suba ka lah ban don ka jingpyndokam ka council ia ka pisa. Kane ka jingduh tulop ki nongtrei JHADC 9 bnai, u ong na ka bynta u minister ki ophisar DCA kan ym ktah ei ei namar kumba don kiba ong ‘wat ka bai bam ki jingri jong ki ha iing ruh la siew ka sorkar’.

Na ka bynta kiba pli ki nongtrei barit ka JHADC pat kam long kumta, ka long pynban kum u shiah ba thar bad duh thiah miet bad sngi. U la ong, ha ka jingshisha kam dei ban jia kumne namar ka sorkar ba ialam ha ka Jylla bad JHADC dei kajuh. U ong ki nongtrei district council ki la hap kylla long nongbylla sngi, nongbylla kynta sha ki iingbriew bad poi u pud ba ki hap bynda ia ki jingdon jingem tang ban ioh bai khaw haiing. Don ruh ki kmie ki kpa ba hap mad jingeh mynta ha ba iadei bad ka result ki khun ki kti tang na ka daw ba kim ioh pisa siew bai skul, sa kawei ruh mynta la dei u bnai lehkmen na ka bynta ka Kristmas bad snem thymmai.

Kine kiei kiei baroh u ong, ki ktah ia ka jingmut jingpyrkhat ki kmie ki kpa kumjuh ruh ia ki khun ki kti. Kumta ka seng ka dawa na u Myntri Rangbah ka sorkar jylla bad na ka Executive Committee ka JHADC ba kin siew mar dor ia ka tulop ba sah ki nongtrei hapoh ka 16 tarik mynta u bnai, kaba dei hi ruh ka bhah jong ka council hi. Lym kumta ka seng VPP kan pynlong da ka jingiakhih wat ban khang ta la syndon ia ka ophis treikam ka JHADC.