Rakhe Advance Christmas u Bah Sanbor, sam jingiarap song pisa ha ki kynhun Balang

U Myntri Sorkar Jylla u Bah Sanbor Shullai mynta ka sngi u la pynlong ia ka jingrakhe Advance Christmas na ka bynta ki paidbah nongshong shnong jong ka South Shillong constituency. Ha kane ka jingrakhe Advance Christmas, la wan shim bynta da ki kynhun Balang bapher bapher, ki Dorbar Shnong bad ki nong shong shnong jong ka South Shillong constituency kynthup ki khynnah rit. Ha kane ka jingrakhe Advance Christmas na ka liang u Bah Sanbor Shullai uba dei ruh u MLA ka South Shillong constituency u la ai jingkyrshan pisa sha ki kynhun Balang bad shaki Dorbar Shnong bad u la sam ruh ia ki jingai sngewbha Christmas sha ki khynnah rit.

Haba kren ha kane ka jingrakhe Advance Christmas, u Bah Sanbor u la ong ba ka jingrakhe Advance Christmas kam dei kaba dang thymmai ha ka constituency namar kum u MLA, u shim ka jijgkitkhlieh ban ai jingiarap pisa sha man la ki kynhun Balang bad ki Dorbar Shnong jong ka constituency na ka bynta ka jingrakhe kaba pahuh pahai. U bah Sanbor u la ong “Kumba long ha ka por Puja man la u snem kum u MLA ka dei ka kamram jong nga ban ai pisa sha baroh ki Puja Committee bad mynta u snem ruh ngan ai jingkyrshan ia baroh ki kynhun Balang khnang ba kin ioh ia ka jingrakhe Christmas bad snem thymmai”.

U Bah Sanbor u kyntu ïa ki paidbah ka South Shillong konstitwensi ba kin ïaid shakhmat ïa ka jingim jong ki da ka jingieit bad sumar iwei ïa iwei pat khamtam ha kane ka aiom lehkmen. U la bynrap ruh ba kum u MLA u dap da ka jingkmen kaba khraw ban ïohi ba ki briew na baroh ki jait jingngeit ki ïawan lang ban ïashim bynta lang ha ka jingrakhe Advance Christmas kumba ju long man ka por.