Pynhap pyrda ar ngut ki Myntri ia ka jingrakhe dap 50 snem ka Govt Girls’ HSS Jowai

Ka Skul Govt Girls’ Higher Secondary School Jowai mynta ka sngi ka la pynhap pyrda ia ka jinglehkmen dap 50 snem ka jingiaid lynti ban shakri ai jingnang jingstad ha ka imlang sahlang bad ia kane ka jinglehkmen la wan ban pynhap pyrda da ki arngut ki myntri sorkar ba kynthup u Lahkmen Rymbui myntri ka tnat pule puthi bad u Wailadmiki Shylla myntri ka koit ka khiah kumjuh ka tnat sport.

La donlang ruh ha kane ka sngi u Director of School Education and Literacy Meghalaya, u Banteilang J Kharshandi MCS, ka Dr W.Sumer Principal Co-ordinator Golden Jubilee Celebration core committee kaba long ruh ka DSEO Jowai, West Jaiñtia Hills, nalor ki nonghikai ki khynnah skul bad kiwei.

U Wailadmiki Shylla haba kren u ong, ha kum kane ka sngi lehkmen dei ban ai khublei iaka jingnang jingstad bala ioh bad ban ai khublei ruh ia baroh kiba don bynta ban synniang ia kane ka shlem ai jinghikai.

U kren ai mynsiem ruh iaki khynnah skul ka Govt Girls’ Higher Secondary School Jowai da kaba ong watla mangi ngi lehkmen ha kane ka skul kaba dei ka jaka pule kyrpang tang naka bynta ki kynthei, don pat ki jaka haka Ri India kj bym shym l kmen haba kha ia i khun kynthei.

Hynrei haba phai shaka Jylla Meghalaya jong ngi pat ka iapher na kiwei ki jaka jongka Ri namar ngi pat ngi sngew ioh jingkyrkhu haba ioh ia i khun kynthei.

Na kata ka daw u kyntu ban shim kabu ia kane ka lad nalor ba haka juk mynta ym don shuh kano kano ba ki kynthei kim lah, da kaba u ai nuksa iaka kynthei kaba bat iaka kyrdan ba hakhlieh duh ka Ri India mynta ka Droupadi Murmu.

Kumta u khmih lynti ruh ba kine ki khynnah skul ka Govt Girls’ Higher Secondary School Jowai kin mih shakhmat haki bynta bapher bapher ka imlang sahlang bad ba kin long nuksa ruh ia kiwei, khamtam ia kito ki khynnah kynthei ba don ka jingangnud haka pule puthi.

Bad ong ruh kum ki nongialam hi katno ki kmen haba ki iohi ba ki jaka pule sorkar ki lehbha haka jingpule.

U Lahkmen Rymbui pat haba kren u ong, mynta dei ka sngi sah jingkynmaw haka sorkar Jylla namar ba kawei naka shlem ai jingnang jingshad ban pynmyntoi iaki khynnah kynthei kala poi sha u mawmer lehkmen dap 50 snem.

Bad kumba ka moto jongka skul ka ong “Think Act Flourish,” u kyntu iaki khynnah skul ban pyndonkam ia kine ki kyntien ba thoh haka moto khnang ban lah shim iaka rai ba biang bad ban jop.

Bad ban lah leh ia kata u ong donkam iaki kmie ki kpa ha iing, ki nonghikai ha skul khnang ban lah tyngshaiñ, hynrei kaba kongsan tam dei ban don halade ka jingraikut kumno ban jop.