Seisoh ka jingiaid kjat 2 kynta shiteng u Bah Renik ha u 2020, treikam pura ka SCWSS

Ka jingleit iaid kjat jong u MLA ka Mawkyrwat, u Bah Renikton L. Tongkhar haduh 2 kynta shiteng ha u snem 2020 ha ka por ba u dang bat kum u Myntri ka tnat PHE naduh na Markhew, Jakrem haduh ha Jashiar ban wad ia ka tyllong um ha Wah Rilang na ka bynta ka Mawkyrwat Greater Water Supply Scheme (MGWSS) ka la long kaba seisoh ha kaba watla ym shym la tan um shuh na Wah Rilang na ka bynta ka MGWSS, hynrei na katei ka jinghiar jurip la ioh ia ka tyllong um na ka bynta ka Sakwang Combine Water Supply Scheme (SCWSS) bad mynta kane ka projek ka la treikam pura bad ki lai tylli ki shnong, kata, ka Sakwang, Pyndensakwang bad Marshillong ki la ioh um lyngba kane ka skhim.

Ha ka Sngi Palei, u Bah Renik la pynlong ia ka jingjurip ba kyndit kyndit ban lap da lade ia ka jingtreikam jong katei ka skhim umdih ba la tip kum ka Sakwang Combine Water Supply Scheme ha wah Rilang, Sakwang kaba jngai kumba 7 KM eiei na Mawkyrwat, South West District Khasi Hill District, kaba la bei tyngka lyngba ka Rural Infrastructure Development Fund (RIDF) ha ka jinglut kaba T.13 klur bad la lap ba katei ka skhim ka la treikam pura bad ka la pynhun ruh ia u kum u MLA.

Haba kren sha ki lad pathai khubor, u bah Renik u la pynpaw ia ka jingkmen ba ka jingiaid kjat jong u kaba ar kynta shiteng ha ka por ba u dang long myntri ka tnad PHE ha u snem 2020 na Markhew ha ka shnong Jakrem sha ka shnong Jashiar ban wad ia ki tyllong um ha Wah Rilang na ka bynta ka Mawkyrwat Greater Water Supply Scheme (MGWSSS) kam shym la long lehnohei satia bad mynta kane ka Sakwang Combine Water Supply Scheme kaba long kaba jop bad ai jingmyntoi ïa ki paitbah jong kitei ki lai tylli ki shnong.

“Nga dap da ka jingkmen kaba khraw ban ïoh jingtip na ki ophisar bad kumjuh ruh na u Myntri ka Sakwang ba ngin ym don jingeh eiei ha kaba iadei bad ka jingdon jong ka um bad ba kane ka project ka la sdang ban ai jingshakri ïa ki paitbah ka shnong Sakwang ha ka Jingiaseng Synod jong ka Khasi-Jaintia Presbyterian Synod ha ka Balang Presbyterian Sakwang ha u Lber 2025,” ong u Bah Renik uba la pynpaw ba watla katei ka projek ka la treikam pura, hynrei ki dang don shibun kiei kiei kiba donkam ban pynbha khamtam haba iadei bad ka bording bad ka ‘pumping station’ khnang ba kan ym don kano kano ka jingeh ha ka jingpynpoi um.

U bah Renik u la pynpaw ruh ba u kwah ban iohi ba baroh ki projek ba la pyntrei da ka sorkar hapoh ka Constituency Mawkyrwat ki dei ban long kiba treikam pura bad nangne shakhmat un iai bteng ban pynlong ia ka jingjurip kyndit ban lap ia ka jingshisha, kata, ka long ba ki projek kidei ban treikam pura ha baroh ki por, ym tang ha ka por ba leit jurip.

Nalor kane, hadien ka jingud jingnam jong ki paitbah ka thain Shngimawlein halor ka jingjot noh jong ka jingkieng iaid kjat ha Wah Rilang ha kaba ki paitbah nongrep katei ka thain ki ju pyndonkam na ka por sha ka por na ka bynta ban leit rep leit riang, u Bah Renik u la leit jngoh ruh ia katei ka jingkieng bad u la kular ban sa pynioh skhim noh ha u snem 2026 na ka bynta ban shna ia katei ka jingkieng iaid kjat na ka bynta ka jingmyntoi jong ki paitbah nongrep.