Shah khang lynti ka HITO bad JNC ha ki briew ba kah durkhmat

Ki Sengbhalang ba kynthup ka Jaintia National Council (JNC), ka Hynniewtrep Integrated Territorial Organization (HITO) bad ki katto katne kiba pyrshah ia ka Shree Cement hynne ka sngi ki la shah pakhang lynti ban leit sha ka Public Hearing hapoh ka shnong Daistong East Jaintia Hills. La ioh jingtip ba naduh dang step ka 19 tarik Nohprah ki Volunteer ka Narpuh Elaka ki la pakhang ia ka surok kaba leit sha Daistong da ka trok bad ki la ia ap shilynter ban pakhang lynti ia kiba pyrshah ia ka Public Hearing ban tei Shree Cement Ltd Daistong. La iohi ruh ba wat u Deputy Commissioner (DC) ka East Jaintia Hills u la hap ieh ia ka kali ha kane ka jaka bad hap iaid da ka kjat.

Naduh ki taiew ba la dep, ki sengbhalang kiba kynthup ia ka JNC, KSU-EJH, bad HYDC, ryngkat bad ki nongshong shnong, ki la dep leit pynsngew ha ka MSPCB, JHADC, bad ha ka ophis u DC ka East Jaintia Hills ban pynsangeh ia kane ka Public Hearing. Na ka liang u President ka JNC u Bah Sambormi ula kynnoh ba ki riewtap khmat kiba rah bad ki tiar pynmynsaw, ki la khang lynti ia ki dkhot ka seng bad kumjuh ruh ia ki nongialam shnong ka Daistong ha ka surok ban leit sha ka jaka ba pynlong ia ka Public Hearing. U Bah Sambormi ula kynnoh ruh ba kine ki riewtap khmat ki dei kiba la bei tyngka da ka Shree Cement Ltd bad kiba la sma kyiad puk puk.

U la ong ba ka JNC ka la dep pynkhreh ia ka jingthoh kaba kdew ia ki jingduna ha ka EIA report kaba pynkhein ia ka ain EIA.”Ka JNC ka la rai ban ujor sha ka High Court halor kane ka jingpynkhein ia ka hok jong ki nongshong shnong ban pynpaw ia ka jingsngew” u la ong. Ka JNC ka la maham ia ka Sorkar ba kan sangeh ka leh donbor da kaba kynnoh ruh ba wat ki pulit ki donkti ha ka jingkhang lynti ia ki nongpyrshah.