Lehkmen Khristmas Bah PT Sawkmie bad ki driver Auto Mawlai

U Bah PT Sawkmie, MLA barim ha ka sngi Balang ka 17 tarik u Nohprah, 2025 u la ioh ban lehkmen Khristmas bad ki driver auto Mawlai kiba don hapoh ka shatri jong ka Motphran Auto Rickshaw Owner’s and Driver Association (MARODA) ba la pynlong hapoh phyllaw jong ka ophis jong ka ha Mawlai Phudmuri.Kane ka jingrakhe ia ka advance Khristmas jong ka MARODA ka long ruh kum shi bynta jong ka jinglehkmen Jubili Rupa ne ka jingdap 25 snem jong ka Association.

Haba ai jingkren kum u kongsan u Bah PT Sawkmie u la ai khublei Khristmas bad snem thymmai ia ka MARODA bad ia baroh kiba don lang ha kane ka sngi.Ha ka juh ka por u kitbok ruh ia ka MARODA ba kan nanglah ban jam shakhmat haba pynlong ia ki prokram bapher bapher kaba kin sa pynlong kum shi bynta jong ka jingrakhe ia kane ka Jubili Rupa.U Bah Sawkmie u la noh jingiarap ruh sha ka Association kum shi bynta ban don bynta lang ha kane ka jingrakhe Jubili Rupa.

Ha kane ka sngi la ioh ruh ia ka khubor Khristmas na ka ktien U Blei ba la ia sam da u Bah Jehan Marsing. Hapdeng jong kane la ioh ruh ia ki jingrwai na ka kynhun i Naphisha bad Paralok, bad kumjuh na ka samla Ibarikynti Reenborn.La ioh ruh ia ka jingkren na rangbah shnong Mawlai Phudmuri bah S. Khongkliam, na u bah E. Marbaniang, ba pyniaid ia ka jingialang, bah S. Diengdoh, pule bad duwai, bah R. Kharmyndai, ba ai khublei bad bah D. Disiar ba kyrkhu pynwai ia ka prokram.