Ïoh jingiarap kiba mad pluh iing ha Nonglum na Bah PT Sawkmie

Kumba u la kular u Bah PT Sawkmie, MLA barim ha ka 23 tarik u  Nohprah ka sngi Hatmajai u la noh jingiarap sha ki ar tylli ki longiing kiba la mad ia ka jingpluh iing ha ka Lah sngi U Blei ka 22 tarik u Nohprah, 2025, kaba la pluh ha ka por kumba 12:30 eiei mynsngi. Īa kaba u la aiti ia kane ka jingiarap song pisa sha ka kong Kyntiewriti Sawkmie bad ka kong Beautilin Sawkmie, kiba mad ia kane ka jingjia basngewsih ha i jingialang balyngkot ba la pyniaid da u rangbah Shnong Mawlai Nonglum bah JS War, ba dei ruh u tymmenbasan.

Nalor ka jingsngewlem u Bah PT Sawkmie la ai mynsiem ruh ia ki, ha kaba u la ong, hapdeng ka jingsngewsih ka wan ka jingkyrmen, hapdeng ka miet ka wan ka jingshai bad hapdeng ka jingkhriat ka wan ka jingsyaid. U pynpaw ba ha ka por ka shitom ka shipa bad ka jingsngewsih kham lah ki marjan marpa, ia kane la sakhi hynnin ka sngi ia ka jingmih ryntih ki paramarjan ban tem ia ka ding bad ban ia sngewlem. Katba ki bahaiing, lah ban ong ba ki wan kham hadien.

U pynpaw ruh, ba kum u nongmihkhmat barim ka dei ka bynta jong u ban ai um ia kiba sliang, ban ai bam ia kiba thngan, ban pynkup jain ia kiba khriat bad ha kajuh ka por ban iarap ia kiba shem lanot bad ka dei ka bynta jong u ban ia don ryngkat ruh bad ki.Haba pyniaid ia ka jingialang u Rangbah shnong u la pynpaw ia ka jingsngewnguh ia u bah Sawkmie halor ka jinglong la kloi jong u ban iarap sha kine ki lanot pluh iing.