Ba thmu thang Coke khlem bud aiñ ha Maweit ujor ka MALOT&LA sha u DC

Ka Maweit Land Owner’s, Trader & Labour Association (MALOT&LA), ha ka sngi nyngkong jong ka taiew, kala leit ban ujor bad ban iakynduh ia u Deputy Commissioner ka West Khasi Hills, halor ka jingkam ba ki artylli ki Coke Factory — kata ka Nongrim Hills Coke Factory kaba don ha shnong Lamjew, Nongstoin Syiemship, bad ka Rymbai Coke Factory kaba don ha u pud u sam shnong Miangkain, Nongstoin Syiemship, West Khasi Hills District — ki la thmu ban thang noh ia u Coke khlem da bud ia ki kyndon aiñ.

Ka jingïathuh jong ka MALOT&LA ka pynpaw ba ia u dewiong la shim be-aiñ, khlem da don ki challan ne ki jingithuh ba biang na ki bor aiñ hynrei hynrei la thmu ban pyntrei bad thang ia u hapoh kitei ki factory.Ha ka jingthoh kaba la phah sha u Deputy Commissioner, ka Association kala pyntip ba kala wan ban pyntip sha u kum u khlieh nongpeit ia ka District hi baroh kawei, ban tuklar mardor ha kane ka bynta, namar ba na ka liang ki paitbah kin sa mih paidbah ha ka 09-01-2026 ha ka por 11:00 baje mynstep, ha katei ka jaka ban khang paidbah ia ka jingpyntrei bad jingthang Coke ha kitei ki factory.

Shuh shuh, na ka liang ki nongialam jong ka MALOT&LA, ha ka jingthoh bala phah sha u DC, ki la kyntu jur bad kyrpad ia u ba un shimkhia ia kane ka kam da kaba phah ia ki bor pulit ha katei ka sngi, khnang ba ym mih kino kino ki jingjia ba sngewsih hapdeng ki paitbah paidbah bad ki nongtrei jong ki factory.