T.2,64000 ïohlum ki pulit na kiba pynkheiñ ia ki kyndon niah kali ha EKH (2ND LEAD)

U Superintendent of Police (SP) ka East Khasi Hills Disctrict u Bah Vivek Syiem ula iathuh, ba ki pulit kila ioh bat palat 300 tylli ki kali kiba la pynkheiñ ia ki kyndon niah kali hapoh ka Nongbah Shillong bad ha ki jaka kiba don ha khapsor. Haba iakren bad ki nongthoh khubor hynne ka sngi, u Bah Vivek ula ong, hadien ba la pyntreikam ia ki jingpynbna ba la mana ban tah ïit ïong ia ki kali, kumta ki pulit kila pynlong ia ka jingkhynra ia ki kali kiba la pynkheiñ ia ki kyndon aiñ niah kali. U SP ula iathuh ba ki pulit ha kine ki bnai kiba la dep, kila ioh bat palat 300 tylli ki kali ki bym shim la bud ryntih ia ki kyndon jingbthah bad kila daiñ kuna ia kitei ki kali kaba la kot baroh T.2 Lak 64,000.

Ula ong, ba ki pulit kin iai bteng ban peitngor bad ban pynshitom ia ki kali ki bym bud ia ki kyndon jingbthah bad ula kyntu ia ki nongniah kali ba kim dei ban tah ïit ïong ia ki kali namar ba la khang pyrshah ia ki paidbah lait noh tang ia kito kiba la pynkup bor da ka aiñ. U Bah Vivek ula kyntu ruh ia ki nongniah kali ba kidei ban weng noh ruh ia ki ki light kiba thaba bham, kiba la pyndiat ha ki kali bad ki thuk thuk namar ka ktah bad pynthud ïa kiwei pat ki kali bad kiba lah ruh ban lam shaduh u pud ban ia takhuh kali ne aksiden. Nalor kane, ula iathuh ba ki pulit kila peit pyrman bha ruh ia ki nongniah ia ki thuk thuk kiba pynher sted, ki bym phong ia ki helmet, namar ba ka buh ha ka jingma ym tang ia u nongniah hynrei wat ia kiwei ruh ki nongniah kali bad ia kiba iaid da ka kjat.

Ula ong, ba ki pulit kila peitngor bad khmih bniah ruh lyngba ki kor CCTV kiba don ha kylleng ki jaka bad lada ki lap ia kine kiba pynkheiñ ia ki kyndon jingbthah, kumta yn sa shim ia ki sienjam bad yn daiñ kuna ruh ia ki.U SP ula pynpaw ruh ia ka jingkmen ba ha ka jingrakhe ia ka Khrismas bad jingpdiang ia u Snem Thymmai, ka tnad pulit kala trei shitom bad kam shim la don ruh kano kano ka jingjia kaba sngewsih bad ka tnad pulit kan sa pynkup burom ruh ia ki pulit kiba la treikam shitom ha ka miet jong ka Khristmas bad u Snem Thymmai ha kylleng ki jaka.