Kiar wan jingïalang u Bah PN Syiem, um tip thikna ïa ka jingïasoh BJP : Bah Pala

U Bah PN Syiem udei uwei u briew uba stad bad uba tip lut iaka aiñ khamtam hapoh ka District Council bad ka Seng Congress ka donkam bha ïa u hynrei naduh ba u rem haka ilekshon MDC sha ka Khasi Hills Autonomous District Council (KHADC), u la kham kiar ban wan shaki jingïalang ba khot da ka Meghalaya Pradesh Congress Committee (MPCC). Ïa kane la ong da u President ka MPCC u Bah Vincent H Pala haba jubab iaki khubor ba kam ba u Bah PN Syiem uba dei ruh u Working President ka MPCC u lah ban pyniasoh noh bad ka Meghalaya Bharatiya Janata Party (BJP).

Haba kren shaki lad pathai khubor u Bah Pala u la ong ba kum u President ka MPCC um don jingtip ba thikna ba u Bah PN Syiem un leit iasoh noh bad ka BJP.U Bah Pala u la ïathuh ba haduh mynta kam pat don ka jingïakren hapoh ka seng Congress halor kata ka khubor ba u Bah PN Syiem un leit iasoh noh bad ka BJP.“Ngim don eiei pyrshah ïa u Bah PN Syiem hynrei ka dei ka jingshisha ba u khlem wan shuh shaki jingialang ka MPCC la kumba 4-5 sien” la ong u Bah Pala.

U President ka MPCC u la pynkynmaw ba u Bah PN Syiem udei u briew uba la shah beh seng teng kynthup naka Congress hynrei mynta ka Seng kam don daw ban beh seng ïa u.“Ngim beh ïa u Bah PN Syiem namar ngim don jingpyrshah ïa u hynrei ka shong haka jingstad jong u ban shim iaka rai hala ka jong ka jingstad” u la ong.“Lada u kwah ban sdang thymmai haka sain hima sima ngam don eiei ban ong namar udei u nongialam uba stad bad ba shemphang bha” u la bynrap.