Sam shithi thungkam u Conrad sha ki SI bad UB

U Myntri Rangbah ka Jylla Conrad K Sangma hynne ka sngi u la aiti ia ki shithi thungkam sha ki Unarmed Branch (UB) Sub Inspector ba thymmai ka Tnat Meghalaya Police ha ka jingialang kaba la pynlong ha 2nd MLP Battalion Headquarter ha Goeragre.Haduh 76 ngut ki Pulit Sub Inspector kila shah jied thymmai ban shimti ia kane ka kyrdan ha ka Tnad Pulit ka Jylla.Haba ai jingkren, u Myntri Rangbah ula ong ba kine ki Sub Inspector ba thymmai ki dei ki “skhor bad ki khmat” jong ka Sorkar Jylla ha ka imlang sahlang. Ula pynpaw ba ki kamram ba hakhmat eh jong ki ka long ban pynneh ia ka shongsuk shongsain, lum ia ki khubor syntiat, bad pynthikna ia ka jingtreikam ba ryntih ha ki kam Ophis.

Haba kren halor ki jingeh jong kane ka kam, u Conrad ula ai jingmut ia kine ki Pulit ba kin long kiba sngewnguh ia ka kyrdan ba ki bat wat hapdeng ka pork aba jynjar.U Conrad u la ong ba ka jingjied ha ka jingthungkam ka dei kaba la leh hapdeng ka lynti kaba shai bad ba khuid ba suba bad pynshlur ia kine ki Pulit thymmai ba kin shimkhia bha ia ki jinghikai pyntbit kaba kin ioh ioh shen.

Ka Director General of Police (DGP) Kong Idashisha Nongrang kala iathuh ba na ki 21007 ngut kiba aplai ia kane ka kam, tang 9507 ngut kila wan iashimbynta ha ka Physical Efficiency Test (PET). Nangne, tang 1970 ngut ki kyrtong kila shah jied ban leh ia ka written examination, kaba lam sha ka jingjied ia ki 76 ngut ki Ophisar. Kane ka Heh Pulit ka pyntip ba bun na kine ki Pulit SI ba thymmai ki dei kiba don ia ka jingtip ha ki lain Technical bad haduh 23% ki dei kiba bat ia ka post-graduate degree.