Dei ba ai lad tih maw beaiñ ba mih ka jingïap ha Rajabala : Dr.Mukul

U MLA ka TMC u Dr. Mukul Sangma ula kynnoh ba ka jingmih ka jingjia ba sngewsih ha Rajabala, ka dei namar kaba sorkar ka shong sngap jar ban ailad ban don ka jingtih maw beain. Lah ban kdew ba hynnin ka sngi Thohdieng ka la mih ka jingjia iakynad ha Rajabala, West Garo hills ha kaba u wei na ki nongialam sengbhalang u la khlad bad uwei u don hapdeng ka jingmynsaw jur. Haba kren hynne ka sngi sha ki lad pathai khubor, u Dr. Mukul ula ong ba u dang pyrshang ban iakren bad ki paidbah ban lap ia ka jingjia naduh tynrai bad ia mynta ym pat lah ban ong ia ka daw. Hynrei kawei kaba u kwah ban ong ka long ba ka kane ka jingjia ka la la jia ha ka jaka ba don bun ki kam tih maw beain.

Ula ong ba kane ka jingjia ha Garo Hills ka jia namar ba ka sorkar ka shong peit kai bad sngap jar ban shah ia ka jingtih maw beain.“ Kane ka sorkar ka tbit bha ban ailad ban shah ia ka kam beain ha ka jylla, kaba long pyrshah ia ka bha ka miat ki paidbah bad ka jylla,” ula ong. Ula kynnoh ba ki don bun ki jingshah tih maw beain ha kane ka jylla, namarkata ym shym la pyntreikam ia ka MRSSA ruh.

“ Kaei kaba nga iohsngew, ngi dei ban tip la ki dkhot sengbhalang ki leit ban khang ne leit ban pynsahngeh ,” ula ong. Ula kyntu ba ki bor District kidei ban shimkhia ban wanrah ia ka jingshong shngain bad ula phah ka khubor sngewlem sha ki bahaiing jong uba la khlad bad kitbok ia uba don hapdeng ka jingshitom ban ioh ia ka jingkoit jingkhiah.