Pynsngewthuh ka DLSA halor ban ïada mariang

Ka District Legal Services Authority West Jaiñtia Hills ryngkat ka jingiatreilang  ka tnat Forest Jowai, mynta ka sngi kala pynlong ka jingpynsngewthuh paidbah halor kumno ban don ka jingkitkhlieh naka bynta ban iada iaka mariang ki sawdong sawkun, kaba la pynlong ha phyllaw ka Jowai Police Station Iawmusiang. Kane ka jingpynsngewthuh paidbah ka long ruh shi bynta ka sienjam jong ka Pan India Environmental Legal Literacy & Community Protection halor ka phang “Protect today secured tomorrow”. Haka jingialang pynsngewthuh ba pyniaid da ka D.Sutong Chief Legal Aid Defense Counsel la ioh ka jingkren naka M.Suchiang Govt Pleader ka tnat Forest West Jaiñtia, na ka S.M Saioo Asst Aid Defense Counsel West Jaiñtia bad u Range Officer Social Forestry Jowai Division.

Kine kiba kren kila pynsngew halor ka jingdonkam jong ka khuid ka suba haki sawdong sawkun, nalor ba ki pynsngew ruh iaka jingdonkam ban thung ki dieng ki seij namar ba ki dieng ki don ka bynta ba khraw ban iada iaka mariang kumjuh iaka jingim briew. U Range Officer Social Forestry Jowai Division u ong, ka jingshim ka sorkar kmie ia kane ka sienjam dei hadien ba ka iohi iaka jinglong sniew palat ka suiñbneng ha Delhi. Te kumba ka phang jong kane ka jingpynsngewthuh paidbah ka ong iada myntra ban im ki pateng, u ong donkam iaka pateiñ mynta ban iada khnang ba ki pateng hadien ruh kin im.

Bad haka jingim  briew ki jingdonkam ba kongsan tam man ka sngi dei ka lyer, ka um bad ka khyndew, kumta dei ban sumar bad iada ia kine  dang mynta khnang ban lait mih ki jingjakhlia haka lyer, ka um bad shah ktah ka khyndew.Namar lada jakhlia yn shah ktah ka mariang bad kane kan buh jingma iaka jingim briew. Kumta ban  lait na kine u kyntu ban thung ki dieng, bad  kumba sngewthuh hi ba donkam ban ot iaki dieng naka bynta ka jingdonkam kum ki briew hynrei dei ban ruh ban thung ki dieng.