Halor ka thungkam ai por shi taiew ka KSU ïa ka MPSC ban pyntreikam ïa ki mat jingdawa

Ki nongialam ka Khasi Students Union (KSU) hynne ka sngi ki la ai por shi taiew ia ka Meghalaya Public Service Commission (MPSC) ba kin pyntreikam ia ki mat jingdawa ba ka seng ka aiti, khnang ban wanrah ka jingkylla ha ka thungkam thungjam bad ka rukom thoh eksam. Ia kane la ong da u Chairman ka Employment & Monitoring Cell ka Khasi Students Union, KSU u samla Reuben Naijar haba kren sha ki lad pathai khubor hynne ka sngi hadien ka jingiakynduh ia u Chairman ka MPSC u bah D. Langstang. U samla Reuben Naijar, ula ong ba ki snem ba ladep ka seng ka la pyllong ia ki jingiakhih ban dawa ban wanrah ia ka thungkam thungjam kaba khuid lyngba ka MPSC sha ka jylla bad ka seng kala buh ia ki 20 tylli ki mat jingdawa ha kaba ka sorkar ka la thaw ruh ia ka Committee ban peit ia ki jingkylla ba lah ban wanrah ha ka MPSC.

Hynrei kaba sngewsih ka long ba wat hadien ba kane ka Committee ka ladep ban aiti ia ka kaiphod bad ha ka 26 tarik Jylliew, 2025 u Myntri Rangbah ka jylla ula batai ia ki jingpynkylla ba la wanrah lyngba ka Committee. Hynrei kaba lyngngoh ka long ba ka MPSC haduh mynta kam shym la pyntreikam ia iwei i jingpynkylla ba la wanrah la bthah da ka sorkar, ong u samla Naijar. “Napdeng ki 20 tylli ki mat jingdawa, kumba shiteng ki la don ha ka jingkylla, hynrei ki dang don sa katto katne kiba ka Committee kam pat pyntreikam,” ula ong. Ula kynnoh ba ka jingbym pyntreikam ka MPSC ia ki jingpynkylla ba la wanrah da ka Committee, kadei namar ba kam kwah ban don ka jingthungkam kaba khuid. “ Ngi dawa ba ka kaiphod ba la wanrah ka Committee, ka MPSC kadei ban pyntreikam mardor hapoh shi taiew ia baroh ki jingpynkylla ba la wanrah da ka Committee,” ong u Chairman ka Employment & Monitoring Cell ka KSU bad bynrap lada kim pyntreikam ka seng kan shim da kiwei ki sienjam kiba kham tyngeh.

Katkum ka jingong u Samla Naijar, mynshwa ki eksam ki ju ai da ki Multiple Choice Question (MCQ) hynrei mynta wat ia ki kam Grade-C bad Grade-D, ki wanrah da ki Discriptive Examination. “ Ngi maham ia ka MPSC ba kam dei ban pyniaid da ki Discriptive Examination namar ia kine ki eksam la ju pyllong tang ia ki eksam kiba heh, ym na bynta ki kam kiba rit,” ula ong. Ula bynrap ba ka seng kan nym ailad ia ka MPSC ba kan pyniaid ia kum kine ki eksam. Nalor kane, ka seng ka la dawa ruh ba ia ki jingpynbna lait kam, ka MPSC ka dei ban pynbna na bynta ki nongshong shnong ka jylla Meghalaya ym na bynta ki paidbah ka ri India.