Shem jingeh ka jylla ban pyniaid shakhmat ka jingpule halor ka AI”

U Myntri ka pule puthi u Bah Lahkmen Rymbui ula ong, katkum ka jingiaid ka por ka jingpyndonkam ia ka Artificial Intelligence ne AI, ka jylla Meghalaya ruh kan hap ban shim ki sienjam bad kam lah ban sahkut hajuh hynrei ka jylla ka la mad ia ka jingeh ban pyniaid shakhmat ia ka jingpule halor ka AI namar ka jingdon duna ki nonghikai ba tbit halor kane ka sobjek. U Myntri Sorkar ula ong, ka jylla Meghalaya ka dang khmih bniah ban wanrah ia ka jingkylla hynrei ban jam shaphrang kan shong pat ha ka jingiatreilang bad ki kynhun ba dei peit bad ki kor teknoloji. U la ong, ba ka jylla ka donkam ban beh ia ka jingiaid katkum kane ka juk bad ka por kaba mynta bad ruh ban pynleit jingmut ha kaban ai iaki jinghikai kiba thymmai katkum ka jingdawa ka por.

“Ngi hap ban ia beh bad kane ka jingiaid ka por kaba mynta bad kane ka juk kaba mynta ne ka rukom kaba thymmai ha ka jingai jinghikai. Kumta ngi dang pyrshang ban wanrah ia ka jingkylla, ha kata ka rukom ia kaei kaba ngi donkam ban leh. Ka long kaba suk ban shu kren da ka ktien ban ia kaba leh da ka kam, namar ba ngi donkam ban iatreilang bad ki paralok halor katei ka bynta. Lada phi ong ba ia ka AI dei ban pyniar ha baroh ki skul, hynrei ka jingkylli kaba mih ka long mano ban hikai ia katei ka sobjek lada ngi kynthup ia ka ha ka Curriculum ha ki jingpule bad kadei ruh kaba kongsan bha ia ngi ban pyndonkam ia ki kor teknoloji” la ong u Bah Lahkmen bad ka bynrap “Ngim lah ban thung ia ki nonghikai AI, hynrei ngi hap ban pyndonkam ia ki teknoloji katba don ia ki kor teknoloji, ki lah ban long ki bym treikam shuh ha ki 10-15 snem ki ban wan, tangba ngi hap pat ban jam shaphrang”.

U la ong ba wat ka Sorkar Pdeng ka dang ialeh ban pyniar ia ka jingpule ha ki teknoloji kiba thymmai bad ka lynti iaid jong ka Meghalaya kan sa long kaba shai kdar bha ha ki snem kiban sa wan.