Rakhe sngi Mariang ka NESFAS bad Khweng Eco Club

Ka NESFAS bad ka Khweng Eco Club, Ri-Bhoi District ha ka sngi Thohdieng ka la rakhe ka sngi Mei Mariang na ka World Environment Day, da kaba pyni ïa ka jingiatreilang jong ki samla bad ka jingri-jingsumar ïa ka Mariang katkum ka jingstad tynrai.

Ha kane ka sngi la wan iashim bynta da ki paidbah shnong, ki khynnah skul, ki nongïalam

shnong, ki nongtrei jong ka NESFAS bad ki nongmihkhmat na ka National People’s Party (NPP). Kane ka jingïalang ka la ban jur ïa ka jingdonkam jong ka jingïatreilang ban ïada ïa ka mariang bad ban sumar hok ïa ki jingdon jingem ba ka mariang ka ai. Ka jingrakhe ka la long katkum ka phang pdeng jong ka World Environment Day mynta u snem, kata “Inspired by Nature. For Climate. For Our Future”, kaba pynpaw ïa ka jingdonkam ba ki shnong ki thaw kin ïa trei lang ban ïada bad pynbha biang ïa ka mariang na ka bynta ki pateng ban wan. Ka Kong Naphi Marwein, ka dkhot jong ka National People’s Party (NPP), kum ka Kongsan ka la ban jur ba ka jingïada ïa ka mariang ka dei ka jingkitkhlieh lang jong baroh bad ka sdang na ka jingdon bynta jong uwei pa uwei. Ka la ai mynsiem ïa ki paidbah shnong ban sumar ïa ka jingsuba bad jingsngur ha ki sawdong sawkun, ban thung kham bun ki dieng bad ban pynlong ïa ka jingsumar mariang kum ka bynta jong ka jingim man ka sngi ym tang ha ki sngi rakhe kyrpang. Ka la pynpaw ruh ïa ka jingsngewnguh ïa ka NESFAS halor ka jingkyrshan ba ka ai sha ka shnong bad pynpaw ïa ka jingkyrmen ba ka jingïatreilang kan dang kham skhem ha ki por ban wan na ka bynta ka jingbha jong ka shnong.

Hadien kata, ki nongïashim bynta ki la shim bynta ha ka jingthung dieng ryngkat bad ki khynnah skul bad ki paidbah shnong. La pyndonkam ïa ki tynrai dieng ba la ai da ka NESFAS ha kane ka jingthung. Ka prokram ka la kut da ka Agrobiodiversity (ABD) Walk kaba la ïalam da ki nongbat jingstad tynrai kiba la ïasam ïa ki khana bad jingtip tynrai shaphang ka mariang sha ki khynnah jong ka Khweng Upper Primary School, ban pynsngewthuh kham bha ïa ka jingïadei hapdeng ki briew bad ka mariang. Ha kane ka sngi la ioh ruh ia ka jingkren u Bah Lastknokhel Jalong, Secretary jong ka shnong Khweng, u la ban jur halor ka jingkitkhlieh lang jong baroh ban ïada ïa ka mariang, ia kaba u la ong, “Ka World Environment Day ka pynkynmaw ïa ngi ba ka Mei Mariang ka kyrshan ïa ka jingim jong baroh. Kumta ka dei ka kamram jong ngi ban ïa trei lang ban pynbha bad ïada ïa ki khlaw jong ngi khnang ba ki mrad khlaw kin lah ban im suk bad ba ki pateng ban wan kin dang lah ban ioh jingmyntoi na ki jingai sngewbha jong ka mariang.” Katba na u Bah Pyniarbor Kharshiing, Consultant ka NESFAS, haba kren halor ki jinghikai ba la ioh na ka por COVID-19, u la ong, “Ka khlam COVID-19 ka la pyni ïa ngi katno ngi shaniah ha ka mariang na ka bynta ka jingim jong ngi. Mynta, palat ban mynshwa, ki imlang sahlang ki dei ban lamkhmat ha ka kam jingïada bad pynbha ïa ka mariang namar ma ki hi ki long ki nongri bad nongsumar ba shisha ïa ki jingdon jingem jong ka mariang.”

Ha pdeng jong kane ka jingrakhe ka long ka jingïoh bynta kaba khraw jong ki samla shnong Khweng kiba la shim ïa ka bynta kaba khraw ha ka jingïada ïa ka jingriewspah mariang jong ka shnong. Lyngba ka Khweng Eco Club, ki samla shnong ki la lah ban pynrung lang ïa ki paidbah, pynsaphriang ïa ka jingtip shaphang ka mariang bad thaw lad ïa ki kam jingïatreilang kiba shong nongrim ha ka jingstad tynrai jong ka shnong. La ioh ruh ia ka jingkren na u Banteilang Syiem, u nongseng jong ka Khweng Eco Club,  na ka Kong Novaliza Sakra, President jong ka Khweng Eco Club bad na ka Ibaniohlang Nongrum.