Pynskhem ka KSU ïa ki nongïalam ba thymmai ka CEC jong ka samoi 2026-29

Ka Khasi Students Union (KSU) hynne kane ka sngi Saitjain ka la pynskhem ia ki nongialam ba thymmai ka Central Executive Council (CEC) na bynta ka samoi treikam jong u snem 2026-2029 ha u Soso Tham Auditorium.Kine ki dkhot nong-kitkam thymmai la pyn-skhem da u bah Samuel B. Jyrwa uba long u nong-ialam barim ka seng KSU bad uba long mynta u Chairman ka Northeast Students Union (NESO) ha ryngkat ka jingdonlang ki nongialam barim ka seng, ki MDC nalor kiwei de.Haba kren ha kane ka sngi, u bah Samuel ula pynpaw ka jingsngewkmen ba la ioh ban pynskhem ia ki nongialam ba thymmai ka seng bad ula kitbok kit rwaing ia ki ba kin ieng ban iakhun na bynta ka ri bad ka jaibynriew.“ Ki nongialam ki leit ki wan hynrei ka seng ka iai tyllun na kawei ka por sha kawei pat. Ha kine ki 48 tylli ki snem ka seng ka la iaid ban ialeh ban ialam ban prat lynti ban iakhun ia ki mat jura kiba ktah ia ka jaidbynriew bad sa tang 2 tylli ki snem kan kynjoh sha ka 50 snem. Dei lyngba ka jingprat lynti jong ki nongseng ki nongialam na kawei ka por sha ka kawei pat bad haduh kane ka por, ki mih ki samla ban bteng ia ka kam jong ka seng,” ong u bah Samuel.

Ubah Samuel ula ong ba ki samla kiba dang shu shah jied ki la shim ia ka jingkular katkum ka riti synshar ka seng. Ka jingshim ia ka jingkular ka long ka jingpynkhem ia ka jingngeit ban trei ban mih shakhmat ban bah ia ka lyngkor ba khia jong ka jaidbynriew.“ Ka long ruh ka jingiai pynkynmaw ia ngi ia ki dawbah tynrai balei ngi pyniasoh sha ka seng kata ka long ba ngi don ka jingangud ban leh ia kaba bha eh na bynta ka ri bad ka jaidbynriew,” ula bynrap.Ha kajuh ka por, ula ong pynkynmaw ba ha jylla Manipur la ar snem tam ka jingialeh ki riewlum kam kut shuh bad namarkata ha ka jylla hap ban long kiba peitngor ban husiar ia ka jingpynpait jaibynriew.Ula kyntu ia ka seng bad ki paidbah bad kidei ban pylleit jingmut ban peitngor ia ki dak ki shin kiba buh ia u dak mynsaw ha ka jaidbynriew.

Ha kane ka sngi, ki dkhot thymmai

ka KSU kila pynkup burom ruh ia ki nongialam barim ka KSU kiba la shongthait na ka seng.

Katba na ka liang u Dr Kynpham Sing Nongkynrih uba dei u Prof. ka skulbah NEHU ula kitbok ia ki nongkitkam ba thymmai bad ai mynsiem ba kin long ki nongialam kiban len lade bad ki kamai hok.U Dr. Kynpham haba kren ha kane ka sngi ula banjur halor ka khein kur khein kha u Khun Hynniewtrep namar kum ki nongialam ka seng kaba khlain tam ha kane ka ri, kidei ban  tip bha shaphang ka jaidbynriew lajong ha shwa ba kin long nongialam.Ka jingsam u Prof. Kynpham halor kane ka mat, ka long namar ba u kwah ba ki nongialam kin ialam ia ka jaidbynriew da ka jingtip.Ha kane ka sngi, na ka liang ki nongialam ba thymmai kila pynkup burom ia ki nongialam barim ka seng kiba la shongthait na ka KSU bad ha kajuh ka por, ka seng kala pyllong ruh ka jingsngap jar kaba shi minit ban kynmaw burom ia ki dkhot ka KSU kiba la khlad ha ka jingshitom bad kiba la kyllon ha madan thma.