Pan jaka ka HSPDP ban pynïeng Motdur u Bah Hopingstone ha Nongstoiñ

Ka HSPDP West Khasi Hills District Youth Wing ka la aiti ïa ka jingthoh sha ka Deputy Commissioner ka West Khasi Hills, ka Kong Hema Nayak, da kaba kyrpad ban ai jaka kaba biang ha sor Nongstoiñ na ka bynta ban pynïeng ïa u motdur ba pura jong u Bah (L) Hopingstone Lyngdoh, MLA barim ka Nongstoiñ Constituency bad uwei na ki nongïalam ba pawnam jong ka jingïakhih Hill State Movement.

Ka seng ka la ong ba kane ka jingthmu ban pynïeng ïa u motdur ka long kum ka dak ka jingburom ïa ki jingnoh synniang ba khraw jong u Bah Hopingstone Lyngdoh uba la aiti lut ïa la ka jingim ha ka jingshakri paidbah, ka jingïada ïa ka hok jong ki paidbah bad ka jingkyrkhu ïa ka jylla Meghalaya.

Ka seng ka la pynpaw ruh ba u Bah Hopingstone Lyngdoh u dei uwei na ki nongïalam ba hakhmat eh jong ka Hill State Movement. Ha ka jingïaid lynti jong ka jingïoh bynta ha ka saiñ pyrthei, u la shakri kum u Chief Executive Member (CEM) ka KHADC, MDC la 27 snem, MLA la 43 snem, Deputy Chief Minister ka jylla Meghalaya bad kum u Member of Parliament (MP) na Shillong Parliamentary Constituency.

Katkum ka jingïathuh jong ka seng, ki jingnoh synniang jong une u nongïalam ki dei ki bynta ba kongsan jong ka histori saiñ hima sima ka jylla Meghalaya. U la trei shitom ban kyntiew ïa ki jingangnud bad jingïada ïa ka hok jong ki Khasi, Jaintia bad Garo bad u la neh kum u nongïalam uba la ïoh jingïaroh na ki paidbah.

Ka seng ka la kyrpad ïa ka District Administration ba kan jied ïa ka jaka kaba biang bad kaba paw ha sor Nongstoiñ na ka bynta ban pynïeng ïa u motdur. Ka la ong ruh ba kane ka sienjam kan ïarap ban pynneh pynsah ïa ka pateng jong u Ma Hopingstone Lyngdoh, ban ai mynsiem ïa ki pateng ban wan bad ban kyntiew ïa ka jingsngewthuh ïa ka histori bad ka kolshor saiñ pyrthei jong ka jylla Meghalaya.