Plie u AL Hek ïa ka ARHI hospital ha Jorabat

Ka long shisha ka jingurlong ia ka thong bad ka jingangnud jong ka kynhun kiba thrang ban shakri ia u paidbah ha ka liang ka sumar sukher hapoh ka jingialam da u Bah AL Hek, kum u Chairman bad ruh u MLA ka Pynthorumkhrah ha kaba mynta ka sngi la plie paidbah noh ia ka ARHI hospital ha Jorabat, Ri Bhoi District.
Ia kane ka hospital, ARHI kaba dei ruh kawei na ki bynta jong ka Far East Wellness Pvt. Ltd, la wan ban plie paidbah da u J.P NaddaMyntri ka sorkar pdeng ba dei khmieh ia ka Tnad Health and Family Welfare and Chemical & Fertilizer, ha ka jingiadonlang ruh u Myntri ka Tnad ka Koit ka Khiah ka jylla Meghalaya u Bah Wailadmiki Shylla, u Myntri ka sorkar jylla u Bah Sosthenes Sohtun, u Bah AL Hek, Chairman ka ARHI hospital nalor ki heh ophisar, ki riew pawkhmat na Meghalaya bad Assam.
Haba kren ha kane ka sngi, na ka liang u JP Nadda, kum u Myntri ka sorkar pdeng u la ai ka jingiaroh kaba khraw ia ka kynhun jong ka ARHI hospital ba la lamkhmat ruh da u Bah AL Hek, halor ka jingiohi jngai ka jong ki ia ka jingdonkam ia ki lad ai jingsumar kiba paka hapoh ka dong bad ka thaiñ Shatei Lam Mihngi.
U la ong ruh, ba ka sorkar pdeng hapoh ka jingialam ba shemphang jong u Myntri Rangbah duh ka Ri u Narendra Modi, ka ri India ka la nang kiew ha baroh ki liang ha ki jylla bapher bapher jong ka ri khamtam ha kaba ia dei bad ki lad jingsumar kiba paka na ka jingpyntreikam hok ruh ia ka National Health Policy of 2017 khamtam ia ka Act East Policy kaba phaikhmat kyrpang ia ki jylla ka thaiñ Shatei Lam Mihngi.
U Nadda u la kdew ruh, ba ka ARHI hospital kan long shisha ka jingkyrkhu ia ki paidbah kane ka thaiñ namar ka dei ka jaka ai jingsumar kaba la but la biang ha ki jingdon jong ki lad jingsumar naduh ki oncology unit, PET-CT scan, critical care services, Neonatal Intensive Care Unit (NICU), advanced diagnostic services bad hynriew tylli ki modular operation theatres ha kaba ki paidbah kim donkam shuh ban leit sha ki jylla kiba heh ban ioh ia ki jingsumar bapher bapher.