Phah jingthoh ka GTF sha ka DC ban khang klong shyiap ha Wah Kynshi

Ka Green Tech Foundation hapoh ka jingïalam u Vice president ka Governing Body u bah Korbarlang Syiemlieh ha ryngkat ka jingïatreilang bad ka Division na Eastern West Khasi Hills District ha ka 9 tarik u Jylliew 2026 ka la leit ban ai da ka jingthoh ha ka Deputy Commissioner ka Eastern West Khasi Hills District, ka kong Anita Kharpor ban kyntu ïa ka bor District ban khang noh mardor ïa ka jingtih shyiap be-aiñ harud ka Wah Kynshi kaba la wanrah ïa ka jingpynjaboh bad pynjot ïa ka wah Kynshi kaba don ha ka thain Mawthadraishan, kaba ka jingjngut jong ka um kala long kum ka sha dud.

U Bah Syiemlieh u ïathuh ba naka liang ki bor District ka Eastern Wet Khasi Hills naka por sha ka por kila leit ban jurip ïa ka wah Kynshi bad la pynmih ruh ïa ki kyndon kumno ban teh lakam ïa ka jingpynjot ne pynjaboh ïa ka wah Kynshi hynrei kaba sngewsih ka long ba kam don ka jingïatreilang naka liang jong ki paidbah. U la ong ba lada ki paidbah kim ai ka jingïatreilang bad ki bor district ka paw shai ba ki paidbah ki pdiang ban pynjot ïa ka mei mariang bad u la kyrpad ïa ki paidbah ban ai ka jingïatreilang bad ki bor District ban pynkut noh ïa ka jingtih shyiap be-aiñ ha kane ka thaiñ.

U bah Syiemlieh ula ong ba ka GTF kam ju ktah ïa ka kam kamai jakpoh jong ki paidbah bad ka ju ïaleh ban wad ïa ki lad ki lynti kumno bam ailad ban kamai jakpoh da ki lynti kiba dei ban ym pynjulor ïa ka mei mariang, hynrei haba ki trai kiba pyntrei ïa ka jingtih shyiap kim bud ïa ki SOP bala pynmih da ka bor District bad haba ki paidbah kila wan ban pynsngew haka GTF naka por sha ka por halor ka jingpynjaboh ïa ka wah kynshi, ka foundation kam banse ban leit buh biang daka jingthoh haka Deputy Commissioner ban dawa ban khang noh mardor ïa ka jingtih shyaip be-aiñ ha kane ka thain watla naka liang ka GTF ha ki snem kiba la dep, kala dep ban pynsngew ïa kane ka juh ka mat haki bor District.

U bah Syiemlieh ula ïathuh ba na ka liang ka Deputy Commissioners kala kular ban shimkhia ïa kane ka jingdawa jong ka GTF bad shen kan sa khot ruh daka jingïalang bad ki khlieh nongshyrshar shnong bad ïamir jingmut halor kane ka mat bad kiwei de ki kam pynneh pynsah mariang.