Pulom ka jingthmu pynkylla ain jied Waheh shnong ha Sohmynting ka JHADC

Ka Selection Committee ka JHADC kaba la thaw dang shen hapoh ka dorbar mang tyngka ka JHADC na ka bynta ban shna pynbha pynmiat ia ka aiñ waheh shnong kaba tip kum ka The Jaintia Hills Autonomous District (Establishment of Elaka and Village and Election, Appointment, Powers, Functions and Jurisdiction of Dolloi/Sirdar and Waheh Shnong) Act, 2015, mynta ka sngi kala hiar ha shnong Sohmynting, West Jaiñtia Hills District ban sngap iaka sur u paidbah, namar ba ha kane ka shnong haki por mynshwa iaka kam waheh shnong la long tang ka kur Pyrtuh, katba haki 3 term bala leit kata naduh u snem 2019 iaka kam waheh shnong la pynlong daka election katkum ka aiñ 2015 ka JHADC bad ioh bynta ban iakhun ne ban jied ruh da baroh ki jait kur ba don ha kane ka shnong.
Naka liang ka Selection Committee la wan ban mihkhmat da u M.B.Rymbai member selection committee uba dei ruh u MDC JHADC ryngkat u Riswel Muruh staff napoh ka political department ka JHADC.
Hadien ka jingkren lamkhmat na u M.B.Rymbai halor ka jingwan jong u ha kane ka sngi, napdeng ki paidbah ba ai jingkren 4 ngut kiba kyrshan ia kaba juh leh haki por mynshwa kata ban long waheh shnong tang ka kur Pyrtuh da kaba pyni iala ka nongrim, katba 10 ngut na kawei pat ka liang ba kyrshan ban pynlong daka Election kumba la iaid naduh u snem 2019 katkum ka aiñ 2015 ka JHADC da kaba ioh bynta baroh lang kila pyni.
Ka liang kiba kwah ban long waheh tang ka kur Pyrtuh haba kren ki ong, kumba ka kur Pyrtuh dei kaba juh shim iaka synshar khadar haki por mynshwa kan eh aiu ban phai biang sha kitei ki por naka bynta ban pynneh pynsah iaka jinghikai ki longshwa manshwa, kumba la pynneh pynsah ia kiwei pat ki riti dustur kum ka jingai jait shaka kynthei, ka jingai pateng iaka hok nongkynti haka khun khatduh.
Ki ong ruh kumba iaka District Council la ai bor lyngba ka Sixth Schedule ban pynneh pynsah iaka khyndew ka shyiap, ka riti dustur bad kumba kane ka shnong dei kaba don iaka riti dustur, kane dei ka lad ban phai biang shaka riti dustur ban pynskhem ia kaba juh pynmlien mynshwa.
Ki ong ruh ba ka jingpyndonkam daka election ka ktah iaka shongsuk shongsaiñ ka shnong.
Katba ka liang kiba kyrshan ban pynlong daka Election kumba la iaid naduh u 2019 ki ong ka District Council ka don la u pud ban shna aiñ, hynrei kam dei ban pynkheiñ pat iaka Article 14 ka constitution ka Ri India, bad ki briew daka jingkren ki lah ban kam hynrei donkam ki kyndon ba biang.
Ki ong ruh ba haki 3 term bala ioh ban ia shim bynta daka election kala long kaba suk ba saiñ, hynrei ka jingwan poi kane ka commitee ka wanrah jingiasngew liang. Kila kdew ruh ba shwa ban wan ka aiñ waheh shnong 2015 iaka kam waheh shnong la juh bat ruh da u bym dei kur Pyrtuh ha kane ka shnong.
Shuh shuh ka liang kiba kyrshan ban bteng daka Election ki ong, haka kam synshar shnong ymdei ban wanrah da kano kano ka jingsngew kur, jingsngew niam ne kiwei pat ki jingsngew, hynrei dei ban ioh bynta salonsar, bad kum ki nongshna aiñ bala jied da u paidbah lada dei ki MDC, MLA bad MP dei maki ki ban peit bishar bniah ba ha kano ka rukom yn thaw iaka aiñ kaba biang salonsar bad kaba iahap katkum ka synshar paidbah ka Ri, namar lada pan na u paidbah baroh kin iakhun shaka kur lade.
“Katba nangiaid ki sngi ki por ngi la nangiaid shakhmat ban wad iaka jingshai la haba iadei ka jingnang jingstad ym ban phai dien naka jingshai shaka jingdum”. Kila bynrap
Ka President VDP ka shnong Sohmynting kaba dei naka jait kur Kyndait kala ieng ban pynrem halor ka jingkynnoh ka liang kur Pyrtuh ba kiba rem daka election kim treh shuh ban iatreilang, ha kaba kala ong ba maka ka dei naka liang ba rem haka election jied waheh ba dang shuh dep shen hynrei iaka la thung da ka kam ba hakhlieh duh ka VDP balei ban kam bym don ka jingiatreilang.
Kala buh jingkylli ruh balei ban ibeiñ ia kiwei ki jait kur kiba dei ki nongshong shnong ba pura.
Hadien ka jingpyni nia ki arliang naka liang u M.B.Rymbai ula pynkut da kaba ong ba um lah ban ai rai namar ba u paidbah ba wan ha kane ka sngi ruh u duna bha naka jingbun paid ki nongshong shnong, hynrei yn dang shong bishar nangne shakhmat khnang ba kiei kiei ba mut ba thmu ruh kan long da kaba ia suk lang u paidbah bad baroh ki jait kur ba don haka shnong Sohmynting.