T.5 lak shisnem na MHIS, T.2 lak na CM Care ka bai sumar ia kiba pang Bampong

Ka Jylla Meghalaya katba nangiaid ki por ka nangkiew kiba ioh jingpang bampong ne cancer bad bun ki briew ki la duh ki mynsiem ba kordor na kane ka jingpang, kumta ban iada na kane ka jingpang bad ban lap ha ka por ba dang biang ka State Cancer Society ka Meghalaya ka la pynlong ka prokram ban pynshai paidbah ha Iawmusiang, Jowai, West Jaintia Hills District ha ka sngi saitjaiñ, ha kaba u myntri ka tnat ka koit ka khiah ka jylla u bah Wailadmiki Shylla ulong kum u kongsan ban pynshai bad pynshlur ia ki paidbah ban kin wan phah peit bniah ha ka por ba biang khnang ban ioh ki lad jingsumar.
Ha kane ka sngi la donlang u Dr. F Shadap BDO Laskein C&RD Block, Dr. P. Shylla, District Medical and Health Officer, Jowai, Dr. Anisha Mawlong, Senior Specialist, Member Secretary, State Cancer Society of Meghalaya, Dr. J C A Lamin, Oncologist, Shillong Medical College Civil Hospital, Doctors, u rangbah shnong Tympang Iawmusiang bah Ajoy K Lywait bad kiwei.
U myntri ka koit ka khiah, u Wailadmiki Shylla u pyntip ba ki jaka sumar sorkar dei kiba la lah ban peit bniah (screening) na ka bynta ban lap kloi ia ka jingpang cancer.
U ong ruh ba ki kor ki bor naka bynta ban peit bniah (screening) kila don ha kiba bun ki PHC, CHC lem ki Hospital sorkar, kumta u pynshlur ia ki paidbah ban wan shakhmat namar da ka jinglah ban lap kloi ia ka jingpang Cancer yn lah ban sumar.
Ula pynkynmaw ruh ia ka jingdonkam ban shim tika HPV Vaccine khnang ban iada na ka Cervical Cancer ha ki kynthei kiba don 12-14 snem bad kine ki tika dei kiba la ai khlem jingsiew ha ki jaka sumar sorkar.
Shuh shuh u pyntip ba ka jingsumar ia kiba ioh Cancer la iarap hapoh ka MHIS Scheme T.5 lak shisnem, lada kloi lut ka pisa ki dang lah ban ioh sa 2 lak tyngka na ka Chief Minister’s Care scheme,. Kumta u pynshlur iaki paidbah ban leit mih sha ka MHIS na ka bynta ban ioh jingiarap.
U myntri u kyntu ruh ia ki paidbah ban iatreilang khnang ban lah kyntiew iaka jingpynsngewthuh haba iadei bad ka koit ka khiah. Namar ban ong ba dei tang ka jingkitkhlieh ka sorkar dei ka bym iahap satia.
Haba batai pynshai iaka jingpang cancer u Dr. JCA Lamin, Oncologist Shillong Medical College Civil Hospital, u ong ba ka jylla kala sakhi shibun kiba ioh pang Cancer ha ka bynta u ryndang ne u Oesophageal (Food Pipe) bud sa ka Mouth Cancer kiba jia na ka daw jingdih sikret bam duma, bam kwai, dih kiad, ka rukom im bym bha bym miat bad ruh ka jingbym pynkhih kilan met, nangta naki jakhlia ka shnong ka thaw bad kiwei.
U ong ruh ba 70-80% ka jingpang Cancer dei kaba lah ban iada bad donkam ban lap kloi, ha kaba ki dak ki shin dei ka jingrai khoh kynsan, slem ban bha ki dak mong, ka jyrhoh ba neh slem, ka jingshitom ban nguid bad don kiba ad ha ka snieh doh.