Plie Myntri ia ka Health ATM Machine ban tip haduh 60 tylli ki test hapoh 10 minit

U myntri ka tnat jong ka koit ka khiah ka sorkar Jylla u bah Wailadmiki Shylla mynta ka sngi ula plie ia ka Health ATM Machine ha Jowai Civil Hospital, Ialong kaba dei ka machine ba lah ban ai jingtip haduh 60 tylli ki jait test ha ka met u briew tang hapoh 10 minit.Ha kane ka sngi plie la donlang ka Director ka tnat Health and Family Welfare (MI), ka Dr. J. Momin, u Deputy Commissioner ka West Jaiñtia Hills, u Abhinav Kumar Singh, ka DMHO ka Dr. P. Shylla, u Medical Superintendent ka Hospital, u Dr. W. Lakiang bad kiwei.Ia kane ka machine la thied ha ka jinglut ba 3.8 lak tyngka lyngba ka CM-Catalytic Fund.Ki test ba lah ban ioh jingtip lyngba kane ka machine kynthup naduh  ka BP, shini, ka jingshit (temperature), ECG, Uric acid, nangta ka bor iohi ki khmat, ka bor ioh sngew,  SpO2, Haemoglobin, ka jingkhia bad kiwei kiwei.

Nalor ka jingplie ia ka machine u myntri ula plie ruh ia ka MHIS Pharmacy ka ban plie baroh 24 kynta ha kane ka hospital.U Wailadmiki haba kren u ong, da kaba leh ia ki Test ha kane ka machine kan pynduna ruh ia ka jinglut jingsep ki paidbah ba wan shim dawai na kane ka Hospital namar tang  hapoh 10 minit kin ioh lut ia ka report ka ban mih lyngba ka slip barit bad kata ka juh ka report kan poi ruh ha u whatsapp number ba thoh ha kane ka machine. Ula kyntu ba ym dei ban shaniah tang ia ka report ba mih na kane ka machine hynrei dei ban rah bad pyni ruh sha ki Doctor. Ka jingplie ia kane ka machine mynta ka sngi dei ka jingsdang jong ka jingpyrshang u iathuh ba un sa buddien ruh ia ka jingtreikam jong ka, bad lada lap ba ka iarap bad ai jingmyntoi yn sa buh ha kiwei pat ki jaka sumaar kum ki CHC bad PHC.

Halor ka jingplie ia ka MHIS pharmacy ban treikam 24 kynta hapoh ka hospital, u kyrmen kan long ka jingiarap bad myntoi ia ki nongpang kiba donkam kyrkieh khamtam por mynmiet.Ha kane ka sngi na ka liang u myntri ka koit ka khiah ula ai ti ruh ar tylli ki Work Order na bynta ban shna ia ki Sub Centre sha ki artylli ki shnong ba hap hapoh ka constituency jong u kynthup ha shnong Ialong  bad ha Sabahmuswang. Ka Sub Centre ha Ialong la mang ban shna ha ka jinglut ba T.55,50,000 katba ha Sabahmuswang pat T.55,05,000.