Angnud u Bah Sanbor ban pyndep kloi ia 2 tylli ki Projek ba T.20 Klur

U Myntri ka Tnad Arts & Culture u Bah Sanbor SHullai ba long ruh u MLA ka South Shillong Constituency ha ka sngi Saitjain ula leit jurip ia ka jingpyntrei ki artylli ki projek, kata ka Rabindranath Tagore Cultural Complex ba la mang pisa T.13.58 klur bad ia ka surok na ïing dorbar Meghalaya Legislative Assembly Rilbong ban pyniasoh sha surokbah (National Highway) hajan jingkieng Umshyrpi.
Ha kane jingleit jurip la ïadonlang ki ophisar na ka tnad PWD bad ka tnad Arts & Culture bad ki nongialam shnong.
Ia ka surok la shna ha ka jinglut ba kot T.6 klur bad la shem kiba bun ki bynta ba la dep bad kaba sah ka long sa tang khyndiat bad ynda la dep
shna ia kane ka surok kan long ka jingkyrkhu ia ki nongshong shnong ka thain Laban.
Haba iakren bad ki lad pathai khubor hadien jong ka jingwan jurip, u Bah Sanbor ula ong ba ula leit ban iakynduh dalade ia u Myntri Kam Pohiing ka Sorkar Pdeng ban ioh ia ka No Objection Certificate (NoC) ban ioh jaka ban shna surok ban pyniasoh ia ka thain Laban sha surokbah ha Umshyrpi.
Ha kaba iadei bad ka Rabindranath Tagore Cultural Complex kaba don mar syndah bad ka Meghalaya Legislative Assembly, u Bah Sanbor ula ong, ba la sdang ia kane ka projek naduh u snem 2021 ha ka por ba long u Myntri ka tnat Art & Culture ka Sorkar Jylla.
“Nga la rah da lade ia ka jingtyrwa sha u Myntri Sorkar Pdeng ba peit ia ka tnad Arts & Culture bad ha ka jingiakren u Myntri ka Sorkar Pdeng ula kular ban ai song pisa T.13.58 klur ban tei ia ka Rabindranath Tagore Cultural Complex” ong u Bah Sanbor.
U la pyntip ha ka jingleit dang shen sha New Delhi ula iakynduh ia u Myntri ka Sorkar Pdeng bad la bthah ba un shimti da lade ia kane ka projek bad kren ia u contractor ban pynsted ia ka jingpyntreikam.
U la bynrap ba u myntri ka Sorkar Pdeng ula pynthikna ba shen un sa pyllait ia ka pisa ha ka wat baar na ka bynta katei ka projek.
U Bah Sanbor ula ong, ka Rabindranath Tagore Cultural Complex kan don ka Museum, Amphitheatre, Guest House, Restaurant, Children Park.