Dawa ka shnong Hingaria ban shna Sub Health Centre bad kam pynroi

Ka Dorbar Shnong Hingaria East Khasi Hills hynne ka sngi ka la ai dorkhas sha u Myntri ka tnat ka koit ka khiah u Bah Wailadmiki Shylla ban dawa shna Sub Health Centre hapoh ka shnong Hingaria.

Ha ka dorkhas ka Dorbar Shnong Hingaria ka la pynpaw ka shnong ka don ha ki thain khappud bad ka jngai tang kumba 1 km duna na Ri Bangladesh.

Ka Dorbar Shnong ka pynpaw ruh nalor ka jingbym don jaka sumar, ka shnong haduh mynta kam pat biang ka bording kaba buh jingeh iaki nong shong shnong haki liang baroh.

“Ka jingbym don jaka sumar hapoh ka shnong ka pynbor iaki paidbah ban wad jingsumar shaki shnong marjan bad teng teng ka jingwad ki lad jingsumar shaki jaka ba jngai ka wanrah ruh ka jingduh mynsiem briew ha shiteng lynti” la ong ka Dorbar Shnong haka dorkhas.

Haka dorkhas ka Dorbar Shnong ka pynpaw ba katkum ka kaiphod bala ioh pdiang naka ophis District Medical and Health Officer (DMHO), East Jaintia Hills District, Khliehriat, la sngewthuh baka tnat kala leh iaka sorjamin (Survey) iaka jaka ban tei Sub Health Centre hapoh ka shnong Hingaria.

“Ngi la ioh jingtip baka iaka jingtyrwa ban tei Sub Health Centre hapoh ka shnong Hingaria ka pynkynriah noh daka ba kynnoh ba ka jaka kam long kaba biang. Naka liang ka Dorbar Shnong ngi kwah ban pynpaw ba ka shnong ka don ka jaka kaba paka bad ka Dorbar Shnong ka kloi ban ai jaka ban tei Sub Health Centre naka bynta ka jingmyntoi ki paidbah nong shong shnong” kala pynpaw.

Ka Dorbar Shnong ka pynpaw ba ka jingbym don Sub Health Centre ka wanrah ka jingeh iaki nong shong shnong khamtam iaki longkmie ba armet ban ioh jingsumar haka por kaba biang.

Kala pynpaw ruh ba ka jingbym ka jaka sumar, ki khunlung khynnah kim ioh ki jait injection (Tika) kiba donkam nalor kiwei ki lad jingsumar naka bynta ki pang ba shitom.

“Namar baka shnong Hingaria ka don markhap bad ka Ri Bangladesh ka long kaba donkam ban don ka jaka sumar kaba paka nalor kiwei ki jait jingtei kam pynroi khnang ban ai ka jingshakri iaki nong shong shnong”.